स्पॉट-फिक्सिंग आणि सट्टेबाजी प्रकरणामुळे गेले काही दिवस भारतीय क्रिकेटला भूकंपाप्रमाणे तीव्र धक्के बसत आहेत. गुरुवारी बसलेल्या आणखी एका जबरदस्त धक्क्यामुळे भारतीय क्रिकेट पुन्हा एकदा हादरले आहे. राजस्थान रॉयल्सचा मालक राज कुंद्राने स्वत:च्या संघावर आपल्या व्यावसायिक सहकाऱ्याच्या मदतीने सट्टेबाजी केल्याची कबुली दिली आहे. दिल्ली पोलिसांनी हा दावा केल्यामुळे या प्रकरणाने उत्कंठावर्धक वळण प्राप्त केले आहे. अडचणीत सापडलेल्या कुंद्राने देश सोडू नये म्हणून पोलिसांनी त्यांचा पासपोर्ट जप्त केला आहे. सट्टेबाजीच्या या जाळ्यात त्याची पत्नी अभिनेत्री शिल्पा शेट्टीसुद्धा सामील आहे का, याचा पोलीस तपास करीत आहे. शिल्पाने ‘ट्विटर’वर आपल्यावरील आरोप फेटाळले आहेत. ‘कोणत्याही सामन्यावर मी कधीच सट्टा लावला नव्हता,’ असे तिने म्हटले आहे. ३६ वर्षीय कुंद्राने गेल्या तीन वर्षांत आयपीएल सामन्यांवरील सट्टेबाजीत सुमारे एक कोटी रुपये गमावले होते, असा दावा चौकशीनंतर पोलिसांनी केला आहे.
‘‘कुंद्राने सट्टेबाजी केल्याचा कबुलीजबाब दिला आहे. तो स्वत:च्याच संघावर सट्टेबाजी करायचा. सट्टेबाजीत बराच पैसा गमावल्याचेही त्याने आम्हाला सांगितले. सट्टेबाज मित्र उमेश गोएंका याच्याद्वारे कुंद्रा सट्टेबाजी करायचा,’’ अशी माहिती दिल्लीचे पोलीस आयुक्त नीरज कुमार यांनी दिली.
कुंद्राचा मित्र आणि व्यावसायिक सहकारी उमेश गोएंका खेळाडूंना संघबांधणी आणि खेळपट्टीविषयक माहिती विचारायचा, असे स्पॉट-फिक्सिंग आणि सट्टेबाजी प्रकरणात साक्षीदार झालेल्या सिद्धार्थ त्रिवेदीने पोलिसांनी सांगितले होते. त्यामुळे सिनेअभिनेत्री शिल्पा शेट्टीचे पती कुंद्राची बुधवारी पोलिसांनी ११ तास कसून चौकशी केली होती. दंडाधिकाऱ्यांकडे नोंदवलेल्या साक्षीत त्रिवेदीने म्हटले होते की, गोएंकाने माझ्याशी संपर्क साधला होता. अहमदाबादची खेळपट्टी आणि संघाची बांधणी यासंदर्भात सखोल माहिती त्याने मला विचारून घेतली होती.
..तर राजस्थान रॉयल्स आयपीएलमधून हद्दपार
चेन्नई सुपर किंग्जचे सीईओ गुरुनाथ मयप्पन सट्टेबाजीत अडकल्यानंतर कुंद्रा हा सट्टेबाजी प्रकरणात अडकलेला दुसरा आयपीएल संघमालक आहे. कुंद्रा याच्याविरोधातील आरोप जर सिद्ध झाले तर बीसीसीआय राजस्थान रॉयल्स संघाला आयपीएलमधून हद्दपार करू शकते. कुंद्रा सट्टेबाजीत होता, पण ‘फिक्सिंग’मध्ये नाही. सट्टेबाजीतील कुंद्रा याच्या सहभागाविषयी दिल्ली पोलिसांनी त्यांची चौकशी केली, असा दावा पोलिसांनी केला आहे.
कुंद्रांचे ‘रॉयल्स’ साम्राज्य
राजस्थान रॉयल्स संघात कुंद्राची ११.७ टक्के हिस्सेदारी आहे. ललित मोदी यांचे बंधू सुरेश चेलाराम यांचे ४३ टक्के, तर मनोज बदाले यांचे ३४ टक्के समभाग आहेत. याशिवाय रुपर्ट मरडॉक यांचा मुलगा लालचन मरडॉक यांचाही वाटा आहे. सूत्रांनी दिलेल्या माहितीनुसार, कुंद्राने गोएंकाच्या नावाखाली स्टीलचा व्यवसाय करणारी एक कंपनी खरेदी केली होती. या कंपनीत कुंद्राचा ४२ टक्के तर गोएंकाचा १६ टक्के हिस्सा आहे.
गुन्ह्यचे स्वरूप व कायद्याच्या आधारे ‘मोक्का’
प्रसारमाध्यमांच्या आणखी एका प्रश्नाला उत्तर देताना नीरज कुमार म्हणाले की, खेळाडूंना आणि सट्टेबाजांना जामीन मिळू नये म्हणून आम्ही ‘मोक्का’ लागू केलेला नाही. आम्ही गुन्ह्याचे स्वरूप आणि कायद्याचा आधार घेत ‘मोक्का’ लावलेला आहे. ‘‘या प्रकरणात अटक झालेल्यांना जामीन मिळू नये म्हणून आम्ही ‘मोक्का’ लावल्याचे म्हटले गेले आहे. परंतु आमचा तो हेतू नव्हता. गुन्ह्याच्या स्वरूपानुसार आम्ही कायद्याची अंमलबजावणी केली आहे,’’ असे कुमार यावेळी म्हणाले.
अंकित चव्हाण न्यायालयास शरण
स्पॉट-फिक्सिंगमधील संशयित अंकित चव्हाण हा क्रिकेटपटू येथील न्यायालयास शरण आला आहे. विवाहामुळे त्याला न्यायालयाने एक आठवडा जामीन दिला होता. त्याच्या जामिनाची मुदत गुरुवारी संपत होती. त्यामुळे तो नवी दिल्लीत हजर झाला. त्याला आता १८ जूनपर्यंत न्यायालयीन कोठडीत ठेवण्यात आले आहे. दरम्यान, त्याने जामिनावर मुक्तता करण्यासाठी पुन्हा नव्याने सत्र न्यायालयाकडे अर्ज सादर केला आहे.