MI vs KKR: “मॅचच्या टेन्शनमुळे दुपारी जेवलो नाही”, अश्वनी कुमारचं स्वप्नवत पदार्पणानंतर वक्तव्य; म्हणाला, “माझ्या गावातील सगळे…”

अश्वनी कुमारचा हा पहिलाच आयपीएल सामना होता. मुंबई इंडियन्सने आयपीएल लिलावात त्याला ३० लाख रूपयांच्या किमतीसह संघात सामील केलं होतं. २०२३ च्या शेर-ए-पंजाब ट्रॉफीमध्ये तो सर्वाधिक विकेट घेणारा गोलंदाज होता, या कामगिरीसह त्याने संघाच्या विजयात मोठी भूमिका बजावली होती.

२३ वर्षीय डावखुरा वेगवान गोलंदाज अश्वनी कुमार पंजाबकडून देशांतर्गत क्रिकेट खेळतो आणि तो मोहालीच्या झांजेरी गावचा आहे. गेल्या मोसमात त्याचा पंजाब किंग्ज संघात समावेश करण्यात आला होता, मात्र त्याला पदार्पणाची संधी मिळाली नाही.

पदार्पणाच्या सामन्यात चार विकेट घेतल्यानंतर अश्विनी कुमार म्हणाला, “या कामगिरीनंतर खूप छान वाटतंय, पदार्पणाच्या सामन्यात दडपण होतं पण सांघिक वातावरणामुळे शांत राहण्यास मदत झाली. मी आज दुपारी जेवलो नाही आणि फक्त केळं खाल्लं. सामन्याचं इतकं टेन्शन होतं की मला भूकही लागत नव्हती. संघ व्यवस्थापनाने सांगितले की हा पदार्पण सामना आहे, मैदानावर जाऊन गोलंदाजीचा आनंद घे आणि आपल्या कौशल्यावर फोकस करत गोलंदाजी कर.”

पुढे अश्वनी म्हणाला, “कर्णधाराने (हार्दिक पांड्या) चांगली साथ दिली आणि चेंडू विकेटवर टाकत राहण्याचा सल्ला दिला. माझ्या गावातील सगळे मला सामन्यात खेळताना पाहत असतील. मला आज खेळण्याची संधी मिळाली आणि मी खूप आनंदी आहे.”

मुंबई संघात दाखल झालेल्या अश्वनी कुमारने आयपीएल कारकिर्दीतील पहिल्याच चेंडूवर अजिंक्य रहाणेला झेलबाद केले. यानंतर त्याने मागे वळून पाहिलं नाही आणि विकेट्सची रांग लावली. अश्वनी कुमारने तीन षटकांत २४ धावा देत चार विकेट घेतले. परिणामी केकेआर संघ ११६ धावांवर सर्वबाद झाला.