IPL 2023 MI vs DC Match Updates: सलग दोन पराभवानंतर मुंबई इंडियन्सने अखेर आयपीएल २०२३ मध्ये आपले विजयाचे खाते उघडले. मंगळवारी अरुण जेटली क्रिकेट स्टेडियमवर झालेल्या सामन्यात मुंबईने शेवटच्या चेंडूवर दिल्ली कॅपिटल्सचा ६ गडी राखून पराभव केला. मुंबईला विजयासाठी १७३ धावांचे लक्ष्य मिळाले होते, ते त्यांनी ४ गडी गमावून पूर्ण केले. या विजयानंतर कर्णधार रोहित शर्माने सामन्यानंतरच्या सादरीकरणात आपले मनोगत व्यक्त केले.
सामना जिंकणे सर्वात महत्वाचे –
रोहित शर्मा म्हणाला, “सामना जिंकणे सर्वात महत्वाचे आहे. आम्ही पहिल्या सामन्यापासून कठोर परिश्रम घेत आहोत. मुंबईत आमचे एक शिबिर होते, निकाल (आमच्या बाजूने) मिळाल्याने बरे वाटले. पहिला विजय नेहमीच खास असतो.” रोहित शर्माला त्याच्या ४५ चेंडूत ६५ धावांच्या खेळीबद्दल सामनावीर म्हणून निवडण्यात आले.
आम्ही येथे कसोटी सामना खेळलो –
पियुष चावलाने तीन विकेट घेतल्या आणि चौथ्या षटकात फिरकीपटू रितिक शोकीनची ओळख करून देणाऱ्या रोहितने आपल्या कामाचे श्रेय संथ गोलंदाजांना दिले. रोहित म्हणाला, “आम्ही येथे कसोटी सामना खेळलो, खेळपट्टी वेगळी दिसत होती. या खेळपट्टीवर संथ गोलंदाज आणने महत्त्वाचे होते. फिरकीपटूंनी आम्हाला खेळात ठेवले.” भारतीय कर्णधार म्हणाला की, एक फलंदाजी एकक म्हणून त्याच्या संघाला पॉवरप्लेचा अधिकाधिक फायदा करून घ्यायचा आहे.
चांगली भागीदारी करणे महत्त्वाचे होते –
कर्णधार रोहित म्हणाला, “एकूण धावसंख्येचा पाठलाग करण्यासाठी आम्हाला चांगली फलंदाजी करायची होती. मला वाटले की सर्वांनी हात वर केले. त्यामुळे मला पॉवरप्लेचा उपयोग करण्याची गरज होती, मला माहित होते की आम्हाला आक्रमण करत राहावे लागेल आणि संधींचा फायदा घ्यावा लागेल.” तो पुढे म्हणाला, “मी भागीदारी करण्याचा प्रयत्न केला, तिलकाशी चांगला संवाद झाला. आमच्यासाठी चांगली भागीदारी करणे महत्त्वाचे होते.”
या सामन्यात प्रथम फलंदाजी करताना दिल्लीने सर्व १० गडी गमावून १७२ धावा केल्या होत्या. प्रत्युत्तरात मुंबईने शेवटच्या चेंडूवर चार गडी गमावून विजय मिळवला. मुंबईकडून कर्णधार रोहित शर्माने सर्वाधिक ६५ धावा केल्या. तिलक वर्माने ४१ आणि ईशान किशनने ३१ धावा केल्या. दिल्लीकडून मुकेश कुमारने दोन आणि मुस्तफिजुर रहमानने एक विकेट घेतली. दिल्लीसाठी, त्यांचा हा सलग चौथा पराभव होता. २०१३ मध्ये सलग सहा पराभवानंतर हंगामातील त्यांची दुसरी सर्वात वाईट सुरुवात आहे.
