Chennai Super Kings vs Gujarat Titans Qualifier 1 Match Today: आयपीएलच्या प्लेऑफ सामन्यांना मंगळवारी (२३ मे) सुरुवात झाली. आज क्वालिफायर-१ मध्ये चेन्नई सुपर किंग्जचा सामना गुजरात टायटन्सशी होत आहे. दोन्ही संघांमधील हा सामना चेन्नईच्या एम.ए. चिदंबरम स्टेडियमवर खेळला जात आहे. गुजरातचा कर्णधार हार्दिक पांड्याने नाणेफेक जिंकून प्रथम गोलंदाजी करण्याचा निर्णय घेतला. सामन्यादरम्यान डॉट बॉलच्या जागी झाडाचा इमोजी दाखवण्यात आला आहे. बीसीसीआय आणि टाटांनी मिळून एक उपक्रम सुरु केला आहे.
इंडियन प्रीमियर लीगच्या १६व्या सीझनचे अधिकृत प्रसारक स्टार स्पोर्ट्स मंगळवारी चेन्नई सुपर किंग्ज आणि गुजरात टायटन्स विरुद्धच्या सामन्यादरम्यान डॉट बॉलऐवजी झाडाचा इमोजी दाखवत आहे. त्यांच्या टीव्ही स्क्रीनवर डॉट बॉलच्या चिन्हाऐवजी झाड पाहून चाहत्यांनाही आश्चर्य वाटले, आम्ही तुम्हाला त्यामागील कारण सांगत आहोत.
खरं तर, बीसीसीआय आयपीएल प्लेऑफ सामन्यांमध्ये टाकलेल्या प्रत्येक डॉट बॉलसाठी झाडे लावणार आहे. इंडियन प्रीमिअर लीगमधील प्ले ऑफच्या सामन्यातील प्रत्येक डॉट बॉलसाठी टाटा समूह आणि बीसीसीआय ५०० झाडं लावणार आहेत. त्यामुळे प्रत्येकाला एकाच प्रश्न पडला आहे की संघासाठी धावा करायच्या का पर्यावरण संवर्धनासाठी डॉट बॉल खेळायचा? पॉवर प्ले मध्ये मोहम्मद शमीने डॉट बॉल टाकले आणि त्यामुळेच त्याने झाडे लावली असे म्हटले जाईल.
हार्दिकने प्रथम गोलंदाजी करण्याचा निर्णय घेण्यामागे दव असण्याची शक्यता वर्तवली. गुजरात संघात एक बदल, यश दयालच्या जागी दर्शन नळकांडेला संघात स्थान देण्यात आले आहे. तो म्हणाला, “आम्ही गुणतालिकेत पहिल्या दोनमध्ये येण्यासाठी खूप मेहनत केली आहे पण कधीकधी तुमचा दिवस वाईट असू शकतो.”
चेन्नईचा कर्णधार एमएस धोनी म्हणाला, “आम्हालाही प्रथम फलंदाजी करायची होती. कारण ओस पडण्याची शक्यता होती. आम्ही आमच्या भक्कम फलंदाजीचे समर्थन करतो. शेवटी तुम्ही तुमच्या खेळावर किती विश्वास ठेवता यावर अवलंबून आहे. ही विकेट पुढे जाऊन संथ होऊ शकते. पण गेल्या सामन्यात जसा दव पडल्याने सामना हातातून निसटला होता. चेन्नई संघात कोणताही बदल नाही. या मोसमात १०व्यांदा चेन्नई कोणताही बदल न करता मैदानात उतरणार आहे. चेन्नईविरुद्धचे तिन्ही सामने गुजरातने पाठलाग करताना जिंकले आहेत.
गुजरातला १७३ धावांचे लक्ष्य
क्वालिफायर-१ मध्ये चेन्नई सुपर किंग्जने गुजरात टायटन्सला १७३ धावांचे आव्हानात्मक लक्ष्य ठेवले आहे. नाणेफेक हारल्यानंतर त्यांनी २० षटकांत सात गडी गमावून १७२ धावा केल्या. ऋतुराज गायकवाडने संघाकडून सर्वाधिक ६० धावा केल्या. डेव्हॉन कॉनवेने ४० धावांचे योगदान दिले. दोघांनी पहिल्या विकेटसाठी ८७ धावांची भागीदारी केली. रवींद्र जडेजाने १६ चेंडूत २२ धावा केल्या. अजिंक्य रहाणे आणि अंबाती रायडूने प्रत्येकी १७ -१७ धावा केल्या. चेन्नईचा कर्णधार महेंद्रसिंग धोनी आणि शिवम दुबे यांनी प्रत्येकी एक धाव केली. चार चेंडूत नऊ धावा केल्यानंतर मोईन अली नाबाद राहिला. गुजरातकडून मोहम्मद शमी आणि मोहित शर्माने प्रत्येकी दोन गडी बाद केले. दर्शन नळकांडे, नूर अहमद आणि राशिद खानला प्रत्येकी एक यश मिळाले.