How RCB Comeback in IPL 2024: आयपीएल २०२४ ची पराभवांनी सुरूवात करणारा आरसीबी सध्या प्लेऑफच्या शर्यतीतील प्रबळ दावेदार आहे. सलग सहा सामने गमावल्यानंतर आरसीबीने जोरदार पुनरागमन केले आहे. त्यानंतर आता सलग पाच सामने जिंकत तळाला असलेला आरसीबीचा संघ पाचव्या स्थानावर आहे. आरसीबीने यंदाच्या हंगामात विलक्षण पुनरागमन केले आहे, पण यामागील नेमके कारण काय होते, याचा खुलासा आरसीबीचा स्टार खेळाडू यश दयाल याने केले आहे.
यश दयालने आयपीएलच्या उत्तरार्धात रॉयल चॅलेंजर्सच्या दमदार पुनरागमनाचे श्रेय संघाच्या आक्रमक खेळाला दिले. गेल्या सामन्यात, RCBने रविवारी दिल्ली कॅपिटल्सचा 47 धावांनी पराभव केला. दिल्लीविरुद्धच्या सामन्यात २० धावांत तीन विकेट घेणारा यश दयाल सामन्यानंतर संवाद साधताना म्हणाला, “गेल्या काही सामन्यांत संघाची कामगिरी बरीच सुधारली आहे. गेल्या काही सामन्यांत आम्ही आक्रमक खेळ खेळायला सुरुवात केली आहे, असे मला वाटते. ही आमच्यासाठी मोठी सकारात्मक बाजू आहे.”
हेही वाचा- IPL 2024: १८ धावा किंवा १८.१ षटके… आरसीबी की चेन्नई कोण गाठणार प्लेऑफ, वाचा कसं आहे समीकरण?
या डावखुऱ्या वेगवान गोलंदाजाने सांगितले की, “जेव्हा आरसीबी पराभवाचा सामना करत होता तेव्हाही संघ ड्रेसिंग रूममध्ये एकजूटीने राहत होता. तो म्हणाला, ‘जेव्हा तुम्ही सलग सामने हरता, जसे आमच्यासोबत घडले, तेव्हा मनोबल थोडे खालावते. पण आम्ही जे घडतंय ते स्वीकारलं आणि चांगले पुनरागमन केले.” दयाल संघाच्या पुनरागमनाबद्दल सांगताना म्हणाला, “पण आम्ही पराभूत होत असतानाही कोणाकडे बोटं दाखवली नाहीत. आम्ही संपूर्ण सत्रात सकारात्मक राहिलो.”
यशने त्याच्या कामगिरीबद्दल बोलताना, आपल्या खेळाचे श्रेय प्रशिक्षकांना दिले. दिल्लीविरूद्धच्या सामन्यातील त्याच्या कामगिरीबाबत सांगताना यश म्हणाला, “याचे श्रेय आमच्या प्रशिक्षकांना जाते. मी जेव्हा जेव्हा गोलंदाजी करायला सुरुवात करतो तेव्हा माझे लक्ष्य फक्त माझ्यासमोरील फलंदाजला बाद करणे असते जेणेकरून मी काही धावा वाचवू शकेन.
हेही वाचा – ‘काय हिरो, गार्डनमध्ये आला आहे का?’ तिलक वर्माचं उत्तर ऐकून रोहित शर्माच झाला चकित, VIDEO व्हायरल
दिल्लीविरूद्धच्या विजयानंतर आरसीबीला पुढील सामना चेन्नई सुपर किंग्सविरूद्ध खेळायचा आहे. या सामन्यात आरसीबीने गणितीय समीकरणानुसार जर चेन्नईचा पराभव केला तर संघ प्लेऑफमध्ये आपली जागा निश्चित करेल.
