राजस्थान रॉयल्सचा अनुभवी फिरकीपटू युजवेंद्र चहलने आयपीएलमध्ये इतिहास रचला आहे. तो या स्पर्धेत सर्वाधिक बळी घेणारा गोलंदाज ठरला. कोलकाता नाईट रायडर्सविरुद्ध आयपीएलच्या १६ व्या हंगामातील ५६व्या सामन्यात चहलने ही कामगिरी केली. त्याने कोलकाताचा कर्णधार नितीश राणाला बाद करून ड्वेन ब्राव्होचा विक्रम मोडला. ब्राव्होने १८३ विकेट्स घेतल्या होत्या. आता हा मुकुट राजस्थान रॉयल्सच्या गोलंदाजाने घेतला आहे. या सामन्यात चहलने ४ षटकात २५ धावा देत ४ बळी घेत पर्पल कॅपचा देखील मानकरी ठरला आहे.
ब्राव्होबद्दल बोलायचे झाले तर त्याने १६१ सामन्यात १८३ विकेट घेतल्या. त्याला मागे टाकण्यासाठी चहलने १८ सामने कमी खेळले. त्याने १४३ व्या सामन्यात ही कामगिरी केली. चहल राजस्थानपूर्वी मुंबई इंडियन्स आणि रॉयल चॅलेंजर्स बंगळुरू संघाचा सदस्यही होता. त्याचवेळी चेन्नई सुपर किंग्ज व्यतिरिक्त ड्वेन ब्राव्हो मुंबई इंडियन्स आणि गुजरात लायन्सकडूनही खेळला होता. आता सक्रिय खेळाडूंबद्दल बोलायचे झाले तर पीयूष चावला, अमित मिश्रा आणि रविचंद्रन अश्विन त्यांच्या मागे आहेत. मात्र, हे तिन्ही खेळाडू चहलच्या खूप मागे आहेत. यंदाच्या हंगामात चहलला मागे सोडणे कठीण आहे.
चहलने कोलकात्याच्या फलंदाजांच्या नांग्या ठेचल्या
कोलकाताविरुद्ध चहलने शानदार गोलंदाजी केली. त्याने चार षटकात २५ धावा देऊन चार विकेट घेतल्या. चहलने व्यंकटेश अय्यर, नितीश राणा, रिंकू सिंग आणि शार्दुल ठाकूर यांना बाद केले. चहलने आयपीएलमध्ये १४३ सामन्यात १८७ विकेट घेतल्या आहेत. चहल गेल्या हंगामात पर्पल कॅपचा विजेताही होता आणि त्याच्या नावावर हॅट्ट्रिकही होती. या हंगामातही त्याची अप्रतिम कामगिरी कायम आहे. सध्यातरी त्याची ही कामगिरी आगामी काळात टीम इंडियात पुनरागमनासाठी टर्निंग पॉइंट ठरू शकते.
आयपीएलमध्ये सर्वाधिक विकेट घेणारा गोलंदाज
| खेळाडू | सामने | विकेट्स |
| युजवेंद्र चहल | १४३ | १८७ |
| ड्वेन ब्रावो | १६१ | १८३ |
| पीयूष चावला | १७६ | १७४ |
| अमित मिश्रा | १६० | १७२ |
| रविचंद्रन अश्विन | १९६ | १७१ |
राजस्थानचा कर्णधार संजू सॅमसनने नाणेफेक जिंकून प्रथम गोलंदाजी करण्याचा निर्णय घेतला. कोलकाताने २० षटकांत आठ गडी गमावून १४९ धावा केल्या. प्रत्युत्तरात राजस्थानने १३.१ षटकात १ गडी गमावत १५१ धावा करत सामना जिंकला. त्याच्यासाठी यशस्वी जैस्वालने ४७ चेंडूत नाबाद ९८ धावांची तुफानी खेळी केली. जसं काही व्हिडिओ गेम सुरु आहे अशी फलंदाजी केली. कर्णधार संजू सॅमसनने नाबाद ४८ धावा करत त्याला चांगली साथ दिली, दोघांनी दुसऱ्या विकेटसाठी १२१ धावांची भागीदारी केली. संघाला एकच धक्का बसला तो जोस बटलरच्या रूपाने. दुसऱ्याच षटकात तो खाते न उघडता धावबाद झाला.
