Chris Gayle on Virat Kohli: वेस्ट इंडिजचा स्फोटक फलंदाज ख्रिस गेलने भारतीय फलंदाज विराट कोहलीच्या उत्कटतेचे आणि दृष्टिकोनाचे कौतुक केले आहे. जेव्हा ते रॉयल चॅलेंजर्स बंगळुरू (RCB) कडून खेळले होते तेव्हा दोघांमधील बाँडिंगवर मत व्यक्त करत वेगवेगळ्या किस्स्यांची आठवण करून दिली. गेल आणि कोहलीने आयपीएलमध्ये अनेक हंगाम एकत्र घालवले, प्रतिस्पर्धी फलंदाजांवर वर्चस्व गाजवले आणि चिन्नास्वामी स्टेडियमवर प्रेक्षकांचे मनोरंजन केले, किमान १० शतकी भागीदारी एकमेकांनी केली आहे.
रॉयल चॅलेंजर्स बंगळुरूचा माजी सलामीवीर आणि युनिव्हर्स बॉस म्हणून प्रसिद्ध असलेला ख्रिस गेल म्हणतो की “आरसीबीकडून खेळताना विराट कोहलीसोबत फलंदाजीचा खूप आनंद झाला. विराटसोबत डान्स करण्यात मजा येत असल्याचेही त्याने सांगितले आहे. मात्र, विराट आणि त्याच्यामध्ये डान्सच्या बाबतीत स्पर्धा झाली तर तो स्वतःच विजेता ठरेल, असा विश्वासही तो व्यक्त करतो.”
‘जिओ सिनेमा’ अ‍ॅपवर बोलताना ख्रिस गेल म्हणाला, “आमच्या दोघांच्या एकत्र फलंदाजीच्या खूप आठवणी आहेत. ते क्षण आम्ही नेहमी जपत राहू. मैदानाबाहेरच्या नृत्याशी निगडित अनेक आठवणी आहेत. ते व्हिडिओ तुम्ही सोशल मीडियावर पाहू शकता. हे क्षणही मी नेहमी जतन करीन.” गेल पुढे म्हणतो, “विराटसोबतची फलंदाजी अप्रतिम होती. त्याची या खेळाची आवड आणि खेळण्याची शैली जबरदस्त होती. याचे श्रेय तुम्ही त्याला द्यावे.”
विराटसोबत डान्सची स्पर्धा असेल तर
धडाकेबाज फलंदाज गेल म्हणतो, “विराट आणि इतर सहकाऱ्यांसोबत ड्रेसिंग रूम शेअर करणे नेहमीच मजेदार होते. एकदा मी तिथे गेल्यावर, मी नेहमी आनंदी असतो आणि खूप मजा करतो आणि नाचतो. जेव्हा मी तिथे माझ्या काही डान्स मूव्हज दाखवल्या तेव्हा मला आढळले की विराटमध्येही उत्तम डान्स करण्याची क्षमता आहे. पण हो, भारतीय डान्स असला तरी फक्त ख्रिस गेलच जिंकेल आणि कॅरेबियन डान्सचा मुद्दा असला तरी फक्त ख्रिस गेलच जिंकेल.”
गेल आणि विराट बराच काळ एकत्र क्रिकेट खेळले आहेत
गेल म्हणाला, “विराट आणि इतर खेळाडूंसोबत ड्रेसिंग रूम शेअर करणे नेहमीच आनंददायी असते. मी नेहमीच आनंद घेतला आहे, नाचले आहोत आणि अशा गोष्टी घडल्या आहेत. RCB त्यांचे माजी खेळाडू गेल आणि एबी डिव्हिलियर्स यांच्या फ्रँचायझीमधील योगदानाबद्दल त्यांचा सत्कार करत आहे.” विराट कोहली आणि ख्रिस गेल दीर्घकाळ एकत्र क्रिकेट खेळले आहेत. जरी आता ख्रिस गेल आणि आरसीबी वेगळे झाले आहेत आणि तो आयपीएलमध्ये देखील मैदानावर दिसणार नाही परंतु सध्या तो फक्त भारतात आहे. आरसीबीच्या हॉल ऑफ फेममध्ये त्याचा समावेश करण्यात आला आहे.
