कोलकाता नाइट रायडर्सचा स्टार फलंदाज रिंकू सिंगने आयपीएल २०२३ मध्ये गुजरात टायटन्सविरुद्धच्या सामन्यात पाच चेंडूत पाच षटकार मारून सर्वांचे लक्ष वेधून घेतले. या दमदार खेळीनंतर भारताचा माजी सलामीवीर वीरेंद्र सेहवागने रिंकू सिंगची तुलना भारताच्या महेंद्रसिंग धोनी आणि सचिन तेंडुलकरशी केली आहे. सेहवागने क्रिकबझवरील कार्यक्रमादरम्यान सांगितले की, “केकेआरच्या फलंदाजी क्रमातील रिंकू सिंगची भूमिका सचिन आणि धोनी यांच्या कारकिर्दीत खेळताना भारतीय संघासारखीच आहे.”
वीरेंद्र सेहवाग म्हणाला, “कोलकाता नाईट रायडर्स संघाला असा विश्वास वाटतो की रिंकू अजूनही आहे. जेव्हा एमएस धोनीने सामना संपवण्यास सुरुवात केली तेव्हा तो आम्हाला देखील इतकाच आत्मविश्वासाने भरलेला दिसत होता की धोनी अजूनही आहे. ९०च्या दशकात तेंडुलकर असेल तर तो सामने जिंकवून देऊ शकतो, तो नसेल तर भारत जिंकू शकत नाही. आता तीच गोष्ट केकेआर आणि रिंकूची आहे. पूर्वी हे काम आंद्रे रसेल करायचा.”
सेहवाग पुढे म्हणाला, “क्रिकेटच्या इतिहासात असे कधीच घडले नाही आणि रिंकू सिंग पुन्हा कधीही करू शकणार नाही. त्याने बनवलेला विक्रम कदाचित मोडला जाईल, पण रिंकू आयुष्यात कधीही सहा षटकार मारून विक्रम मोडू शकणार नाही.” तो पुढे संवाद साधताना म्हणाला, “तुलाही नशिबाची गरज आहे. जर अल्झारी जोसेफ इथे गोलंदाजी करत असेल तर रिंकूलाही कळले असते की तो त्याला कधीच फटके मारू देऊ शकणार नाही. मात्र त्याने आयुष्यभर नेटमध्ये यश दयालचा सामना केला आहे. अखेरच्या षटकात पाच षटकार मारणारा रिंकू पहिला खेळाडू ठरला आहे.”
आयपीएल २०२३च्या १९व्या सामन्यात कोलकाता नाईट रायडर्सला सनरायझर्स हैदराबादकडून पराभवाचा सामना करावा लागला असेल, परंतु या सामन्यातही रिंकू सिंगच्या खेळीने चाहत्यांची मने जिंकली. २२८ धावांचा पाठलाग करताना केकेआरचा संघ २० षटकांत केवळ २०५ धावाच करू शकला. या सामन्यात रिंकू सिंगने शेवटपर्यंत झुंज दिली पण त्याची ५८ धावांची नाबाद खेळीही केकेआरला जिंकू शकली नाही. रिंकूने ३१ चेंडूंत ४ चौकार आणि ४ षटकारांच्या मदतीने तुफानी ५८ धावा केल्या.
