विल जॅक्सचे शतक आणि कोहलीच्या विराट फलंदाजीच्या जोरावर आरसीबीने गुजरातवर ४ षटके आणि ९ विकेट्स राखून मोठा विजय मिळवला. अखेरच्या चेंडूवर मोठा षटकार खेचत विल जॅक्सने आपले शतक पूर्ण केले. गुजरातने दिलेल्या २०१ धावांच्या लक्ष्याचा पाठलाग करताना विराट आणि विल जॅक्सच्या विक्रमी भागीदारीच्या जोरावर जबरदस्त फलंदाजीचे प्रदर्शन केले. आरसीबी संघाने १६ षटकांत १ गडी गमावून २०६ धावा केल्या. अवघी एक विकेट गमावत आरसीबीने मिळवलेल्या या विजयानंतर गुणतालिकेत २ गुण मिळवले आहेत.
विराट कोहली आणि विल जॅक्सची जोडी शेवटपर्यंत नाबाद राहिली. विराटने ४४ चेंडूत ३ षटकार आणि ६ चौकारांच्या जोरावर ७० धावा केल्या. तर शतकी कामगिरी केलेल्या विल जॅक्सने ४१ चेंडूत १० षटकार आणि ५ चौकारांच्या मदतीने १०० धावा पूर्ण केल्या. विल जॅक्सची विराटला मिळालेली साथ महत्त्वपूर्ण ठरली. या दोघांनीही दुसऱ्या विकेटसाठी १६६ धावांची भागीदारी केली. तर संघाला चांगली सुरूवात करून देणाऱ्या फाफ डू प्लेसिसने १२ चेंडूत ३ षटकार आणि एका चौकारासह २४ धावा करत साई सुदर्शनच्या गोलंदाजीवर बाद झाला.
तत्पूर्वी नाणेफेक गमावल्यानंतर प्रथम फलंदाजी करताना ३ बाद २०० धावा केल्या. फलंदाजी करताना गुजरातची सुरूवात फारशी चांगली झाली नाही. वृध्दिमान साहा अवघ्या ५ धावा करत बाद झाला, तर शुबमन गिलही अपयशी ठरला. त्याने १९ चेंडूत एका चौकारासह केवळ १६ धावा केल्या आणि मॅक्सवेलच्या गोलंदाजीवर झेलबाद झाला. त्यानंतर आलेल्या भारताच्या युवा फलंदाजांनी गुजरातला सन्मानजनक धावसंख्येपर्यंत नेले. साई सुदर्शन आणि शाहरूख खान यांनी मधल्या षटकांमध्ये चांगली फलंदाजी केली.
साई सुदर्शनने शेवटपर्यंत नाबाद राहत ४९ चेंडूत ४ षटकार आणि ८ चौकारांसह ८४ धावा केल्या. तर शाहरूखने आयपीएलमधील आपले पहिले अर्धशचतक झळकावत ३० चेंडूत ५ षटकार आणि ३ चौकारांसह ५८ धावा केल्या. सिराजच्या घातक वेगवान चेंडूवर शाहरूख क्लीन बोल्ड झाला नसता तर त्याने अजून काही धावांची नक्कीच भर घातली असती. यानंतर आलेल्या डेव्हिड मिलरने साई सुदर्शनला चांगली साथ देत १९ चेंडूत २६ धावा केल्या.
