IPL 2025 CSK VS RCB Highlights: बंगळुरूने १७ वर्षानंतर भेदला चेन्नईचा गड; दमदार सांघिक खेळासह दणदणीत विजय

आयपीएल २०२५ हंगामाचा ८वा सामना चेन्नई सुपर किंग्ज आणि रॉयल चॅलेंजर्स बंगळुरू यांच्यात खेळवला जाणार आहे. स्थानिक वेळेनुसार बरोबर साडेसात वाजता हा सामना सुरू होईल.

आयपीएल इतिहासातील सर्वात यशस्वी संघापैकी एक असलेल्या चेन्नई सुपर संघातही मोठे बदल पाहायला मिळत आहेत. आयपीएल २०२५ च्या महालिलावात जुना सहकारी रवीचंद्रन अश्विनला सीएसकेने ताफ्यात सामील केलं आहे. आयपीएलच्या सुरुवातीला अश्विन चेन्नई सुपर किंग्जचाच भाग होता. चाळिशीकडे झुकलेल्या अश्विनसाठी चेन्नईने ९.७५ कोटींची बोली लावली. आता जडेजा-अश्विनही फिरकी जोडी सीएसकेच्या ताफ्यात पुन्हा एकत्र दिसेल.

चेन्नईने त्यांचा भरवशाचा यष्टीरक्षक फलंदाज डेव्हॉन कॉन्वेला संघात समाविष्ट केलं. रचीन रवींद्रसाठी त्यांनी राईट टू मॅचचा अधिकार वापरला. स्फोटक खेळींसाठी प्रसिद्ध राहुल त्रिपाठीलाही त्यांनी संघात घेतलं. तब्बल १० कोटी रुपये खर्चून चेन्नईने अफगाणिस्तानचा युवा डावखुरा फिरकी गोलंदाज नूर अहमदला ताफ्यात घेतलं आहे. चेन्नईने खलील अहमद या उंचपुऱ्या डावखुऱ्या वेगवान गोलंदाजावरही विश्वास ठेवला आहे. मूळच्या तामिळनाडूच्याच विजय शंकरला चेन्नईने घेतलं आहे.

चेन्नई सुपर किंग्जने पाच खेळाडूंना रिटेन केलं. ज्यामध्ये कर्णधार ऋतुराज गायकवाड, रवींद्र जडेजा, मथिशा पाथिराना, शिवम दुबे आणि एमएस धोनी यांचा समावेश आहे. चेन्नईने रवींद्र जडेजाला १८ कोटी रुपये दिले आहेत. ऋतुराज गायकवाडलाही १८ कोटींना कायम ठेवण्यात आले आहे. मथिशा पाथिरानाला १३ कोटी रुपयांमध्ये कायम ठेवण्यात आले आहे. शिवम दुबेला १२ कोटी आणि धोनीला अनकॅप्ड खेळाडू म्हणून ४ कोटींमध्ये कायम ठेवण्यात आले आहे.

चेन्नईच्या संथ आणि धीम्या खेळपट्टीवर धावा करणं कठीण मानलं जातं. फिरकीपटू गारुड दाखवत फलंदाजांना माघारी धाडतात. प्रचंड पाठिंबा असणाऱ्या चेपॉकवर धोनी सेनेविरुद्ध चांगलं खेळण्याचं आव्हान बंगळुरूच्या खेळाडूंसमोर आहे. सगळे हंगाम खेळूनही जेतेपदापासून दूर राहिलेल्या आरसीबी संघाला यंदा जेतेपद खुणावतं आहे. दुसरीकडे पाच जेतेपदं नावावर असलेल्या चेन्नईला चाहत्यांसाठी आणखी एक जेतेपद पटकवायचं आहे.