IPL 2018 KKR vs RR : राजस्थानचा विजय रथ कोलकाताने रोखला, ६ गडी राखून मिळवला विजय

जोस बटलरने केलेल्या आक्रमक सुरुवातीनंतरही मधल्या फळीतल्या फलंदाजांनी हाराकिरी केल्यामुळे राजस्थानचा संघ पुन्हा एकदा कोलमडला. कोलकात्याच्या संघातील गोलंदाजांनी मधल्या षटकांमध्ये टिच्चून मारा करत राजस्थानच्या डावाला वेसण घातली. कुलदीप यादवने राजस्थानच्या डावाला खिंडार पाडत ४ फलंदाजांना माघारी धाडलं. याव्यतिरीक्त आंद्रे रसेल, प्रसिध कृष्णा यांनी प्रत्येकी २-२ बळी घेत कुलदीपला चांगली साथ दिली. राजस्थानकडून अखेरच्या फळीत जयदेव उनाडकटने फटकेबाजी करत संघाच्या डावाला चांगला आकार दिला. दरम्यान, कोलकाताच्या दिनेश कार्तिक आणि अॅन्ड्र्यू रसेल यांनी नाबाद राहत ५१ धावांची भागिदारी करीत आपल्या संघाला विजय मिळवून दिला. कोलकाता नाईट रायडर्सने राजस्थान रॉयल्सचा विजय रथ रोखत ६ गडी राखून सहज विजय मिळवला.