IPL 2018 : ब्राव्होच्या झुंजार खेळीने चेन्नई ठरली ‘सुपर किंग’ मुंबईचा विजय हिसकावला!

डावाच्या सुरूवातीला वॉटसनने चांगली सुरुवात केली. मात्र तो झेलबाद झाला आणि त्यानंतर चेन्नई सुपरकिंग्जची पडझड सुरु झाली. अंबाती रायडूची विकेट मयंक मारकंडेने घेतली. त्यामुळे चेन्नईला आणखी एक झटका बसला. ज्यानंतर सुरेश रैना ४ धावांवर, महेंद्र सिंह धोनी ५ धावांवर, रविंद्र जडेजा १२ धावांवर, दीपक चहार ० धावांवर, हरभजन सिंह ८ धावांवर तर मार्क वुड १ धावेवर आऊट झाले. मुंबईच्या हाती मॅच गेली आहे असे वाटत असतानाच ब्राव्होने अत्यंत आक्रमक खेळी करत कठीण वाटणारे आव्हान सोपे केले आणि मुंबईच्या तोंडून विजयाचा घास हिरावला.

नाणेफेक जिंकल्यावर सर्वात आधी चेन्नई सुपरकिंग्नजने क्षेत्ररक्षण करण्याचा निर्णय घेतला. मुंबई इंडियन्सची बॅटिंग सुरु झाली. संथ खेळ करणाऱ्या मुंबई इंडियन्सचा इ लुईस धावचीत झाला. त्यानंतर रोहित शर्माने डाव सावरण्याचा प्रयत्न केला. मात्र वॉटसनने त्याचा झेल टीपला. त्यानंतर आलेल्या ईशान किशन सूर्यकुमार यादव या दोघांनी ८३ धावांची भागिदारी करत मुंबईचा डाव सावरला. त्यानंतर हार्दिक पंड्या आणि कृणाल पंड्या यांनीही चांगली खेळी करत मुंबईची धावसंख्या १६० धावांच्या पुढे जाण्यास हातभार लावला. कृणाल पंड्याची डावातली २२ चेंडूत केलेली ४२ धावांची खेळी निर्णायक ठरली. मात्र चेन्नईवर मात करण्याचे मुंबईचे स्वप्न मात्र अपुरेच राहिले.