आयपीएलचा तेरावा हंगाम जसाजसा जवळ येतो आहे तशी वेळापत्रकाबद्दल चाहत्यांमध्ये उत्सुकता वाढत आहे. १९ सप्टेंबरपासून आयपीएलला सुरुवात होणार आहे तरी आतापर्यंत बीसीसीआयने वेळापत्रक जाहीर केलं नाही. मध्यंतरी चेन्नईच्या संघातील दोन खेळाडूंना करोनाची लागण झाल्यामुळे बीसीसीआयने वेळापत्रकाची घोषणा लांबणीवर ढकलली. सोशल मीडियावरही चाहते बीसीसीआय आयपीएलचं वेळापत्रक कधी जाहीर करणार याची वाट पाहत आहेत.

काही दिवसांपूर्वी प्रसारमाध्यमांमध्ये आलेल्या वृत्तानुसार…मुंबई इंडियन्स विरुद्ध चेन्नई सुपरकिंग्ज यांच्यात सलामीचा सामना रंगेल अशी शक्यता वर्तवण्यात येत होती. परंतू आयपीएलच्या अधिकृत ट्विटर हँडलवर चाहत्यांची उत्सुकता वाढवण्यासाठी RCB आणि KKR संघाच्या कर्णधारांचं एक पोस्टर टाकण्यात आलंय. ज्यावरुन या दोन्ही संघांमध्ये यंदाच्या हंगामाचा सलामीचा सामना रंगणार आहे असा अंदाज वर्तवला जात आहे.

भारतात करोनामुळे निर्माण झालेली परिस्थिती लक्षात घेता बीसीसीआयने यंदाच्या हंगामाचं आयोजन युएईत केलं आहे.