IPL 2020 : सलग तीन पराभव झाले म्हणून संघ वाईट ठरत नाही – अजिंक्य रहाणे

“आम्ही सुरुवातीच्या सामन्यांमध्ये चांगली कामगिरी केली. ९ पैकी ७ सामने जिंकत आम्ही चांगल्या फॉर्मात होतो. गेल्या ३ सामन्यांमध्ये आमच्या रणनितीप्रमाणे काही घडत नाहीये. पण आयपीएल सारख्या स्पर्धेत असं होणं अपेक्षित असतं. साखळी फेरीत तुम्हाला १४ सामने खेळायचे असतात, ही खूप मोठी स्पर्धा आहे. त्यामुळे सातत्य कायम राखणं ही प्रत्येक संघासाठी मोठी आव्हानात्मक गोष्ट असते. पुढील दोन सामने आमच्यासाठी महत्वाचे आहेत. आम्ही सकारात्मक आहोत. सलग तीन सामने गमावल्यामुळे संघ वाईट ठरत नाही. आम्ही आमच्यातली क्षमता ओळखून एकमेकांना चांगला पाठींबा देत राहिलो तर आम्ही नक्कीच फॉर्मात येऊ.” मुंबईविरुद्ध सामन्याआधी अजिंक्य रहाणेने संघाच्या तयारीबद्दल माहिती दिली.

शनिवारी दिल्लीचा सामना प्ले-ऑफमध्ये क्वालिफाय झालेल्या मुंबई इंडियन्ससोबत असणार आहे. मुंबईविरुद्ध सामन्यात प्रत्येक खेळाडूने स्वतःच्या क्षमतेवर विश्वास ठेवून खेळणं गरजेचं असल्याचंही अजिंक्य म्हणाला. मुंबईचा संघ तुल्यबळ असला तरीही दिल्लीचे खेळाडू विजयाच्या इराद्यानेच मैदानात उतरतील असं अजिंक्यने स्पष्ट केलं.