Jos Buttler returns to England : संजू सॅमसनच्या नेतृत्वाखाली राजस्थान रॉयल्स संघ आयपीएल २०२४ मध्ये चांगली कामगिरी करत आहे. संघाने आतापर्यंत १२ पैकी ८ सामने जिंकले आहेत. चार सामन्यांत संघाचा पराभव झाला आहे. अशा प्रकारे राजस्थान रॉयल्सचे १६ गुण आहेत आणि संघ गुणतालिकेत दुसऱ्या स्थानावर आहे. राजस्थानचे अजून दोन सामने बाकी आहेत, तत्पूर्वी राजस्थान रॉयल्ससाठी एक वाईट बातमी आली आहे. या दोन सामन्यांमध्ये संघाचा स्टार खेळाडू जोस बटलर राजस्थान रॉयल्सचा भाग असणार नाही. त्याचा एक व्हिडीओ राजस्थानने शेअर केला आहे. राजस्थान रॉयल्सचा स्टार सलामीवीर फलंदाज जोस बटलर मायदेशी परतला आहे. आता तो आयपीएल २०२४ मध्ये राजस्थान रॉयल्सच्या उर्वरित दोन सामन्यांमध्ये खेळू शकणार नाही. त्यामुळे राजस्थान रॉयल्सच्या अडचणी वाढल्या आहेत. कारण हे दोन्ही सामने संघाला प्लेऑफमध्ये स्थान पक्के करण्यासाठी खूप महत्त्वाचे आहेत. जे त्यांना पंजाब किंग्ज आणि केकेआरविरुद्ध खेळायचे आहेत. आयसीसी टी-२० विश्वचषक २०२४ पूर्वी इंग्लंड संघाला पाकिस्तानविरुद्ध चार टी-२० सामन्यांची मालिका खेळायची आहे. या मालिकेतील पहिला सामना २२ मे रोजी होणार आहे. पाकिस्तानविरुद्धच्या टी-२० मालिकेसाठी जोस बटलर इंग्लंडचा कर्णधार आहे. त्यामुळे पाकिस्तानविरुद्धच्या टी-२० मालिकेत सहभागी होण्यासाठी तो इंग्लंडला परतला आहे. टी-२० विश्वचषकाच्या तयारीच्या दृष्टीने पाकिस्तान आणि इंग्लंडसाठी टी-२० मालिका खूप महत्त्वाची आहे. हेही वाचा - IRE vs PAK 2nd T20I : अफगाणिस्तानच्या चाहत्याने शाहीन आफ्रिदीशी केले गैरवर्तन, VIDEO होतोय व्हायरल जोस बटलरची आयपीएल २०२४ मधील कामगिरी - आयपीएल २०२४ मध्ये जोस बटलरची कामगिरी चांगली राहिली आहे. त्याने ११ सामन्यांमध्ये ३५९ धावा केल्या आहेत. ज्यात २ शतकांचा समावेश आहे. त्याने संघासाठी अनेक चमकदार खेळी साकारल्या आहेत. त्यामुळे प्लेइंग इलेव्हनमध्ये त्याची उपस्थिती राजस्थान रॉयल्सला बळ देत होती. राजस्थान रॉयल्स संघाने सोशल मीडिया प्लॅटफॉर्म एक्सवर एक व्हिडीओ शेअर केला आणि लिहिले की, "मिस यू जोस भाई." हेही वाचा - Match Fixing : चेन्नई-राजस्थान सामना ‘फिक्स’ होता का? मनोज तिवारी आणि वीरेंद्र सेहवागने उपस्थित केले गंभीर प्रश्न आयपीएलमध्ये जोस बटलरच्या नावावर ३००० पेक्षा जास्त धावा - जोस बटलर हा स्फोटक फलंदाजीत पारंगत खेळाडू आहे. एकदा तो क्रीजवर सेट झाला की त्याला आऊट करणे कठीण होते. अवघ्या काही चेंडूंमध्ये तो सामन्याचा मार्ग बदलतो. त्याने आतापर्यंत १०७ आयपीएल सामन्यांमध्ये ३५८२ धावा केल्या आहेत, ज्यात ७ शतकांचा समावेश आहे. याशिवाय त्याने १९ अर्धशतकेही केली आहेत. बटलरची आयपीएलमधील सर्वोच्च धावसंख्या १२४ धावा आहे.
