Virat Kohli’s Performance vs Sunrisers Hyderabad: आयपीएल २०२३ मधील ६५ वा सामना गुरुवारी रॉयल चॅलेंजर्स बंगळुरु आणि सनरायझर्स हैदराबाद यांच्यात होणार आहे. हा सामना हैदराबादच्या राजीव गांधी आंतरराष्ट्रीय स्टेडियमवर होणार आहे. प्लेऑफचे सामने लक्षात घेता हा सामना आरसीबीसाठी खूप महत्त्वाचा आहे. या सामन्यात विराट कोहलीची बॅट पुन्हा एकदा तळपावी, अशी आरसीबीच्या चाहत्यांना अपेक्षा आहे. पण त्याआधी सनरायझर्स हैदराबादविरुद्ध त्याचा विक्रम कसा आहे हे जाणून घेऊया.
विराट कोहलीची हैदराबादविरुद्ध असलेली आकडेवारी –
सनरायझर्स हैदराबाद विरुद्ध विराट कोहलीची आकडेवारीबद्दल बोलायचे, तर कोहली हैदराबादविरुद्धच्या मागील दोन डावात गोल्डन डकचा (पहिल्या चेंडूवर बाद होणे) बळी ठरला आहे. त्याच वेळी, कोहलीने हैदराबादविरुद्ध आतापर्यंत एकूण २० डाव खेळले आहेत, ज्यामध्ये त्याने ३१.६च्या सरासरीने आणि १३६.८च्या स्ट्राइक रेटने ५६९ धावा केल्या आहेत.
यादरम्यान त्याच्या बॅटमधून ४ अर्धशतके झळकली आहेत, तर त्याची सर्वोच्च धावसंख्या नाबाद ९३ आहे, जी त्याने २०१३ मध्ये केली होती. त्याचवेळी २०१६ मध्ये हैदराबादविरुद्ध त्याने शेवटचे अर्धशतक झळकावले होते. त्याचवेळी, हैदराबादविरुद्ध खेळल्या गेलेल्या २० डावांमध्ये कोहली एकूण ३ वेळा खाते न उघडता ० धावांवर पॅव्हेलियनमध्ये परतला आहे. याशिवाय त्याच्या बॅटमधून ५४ चौकार आणि २१ षटकार आले आहेत.
हेही वाचा – PBKS vs DC: इशांत शर्माच्या नो बॉलवर उठले प्रश्न, चाहत्यांना ‘या’ दोन सामन्यांची झाली आठवण
आयपीएल २०२३ मध्ये, पहिला सामना सनरायझर्स हैदराबाद आणि रॉयल चॅलेंजर्स बंगलोर यांच्यात होणार आहे. त्याच वेळी, मागील हंगामात म्हणजेच आयपीएल २०२२ मध्ये खेळल्या गेलेल्या दोन सामन्यांमध्ये कोहली दोन्ही डावात गोल्डन डकचा बळी ठरला होता.
आरसीबीला प्लेऑफसाठी दोन्ही सामने जिंकणे आवश्यक –
प्लेऑफसाठी पात्र होण्यासाठी आरसीबीला त्यांचे शेवटचे दोन सामने जिंकणे आवश्यक आहे. हैदराबादनंतर आरसीबीचा सामना गतविजेत्या गुजरात टायटन्सशी होणार आहे. दोन्ही सामने जिंकूनही संघाला काही संघांच्या निकालावर अवलंबून राहावे लागणार आहे. आता आरसीबी या मोसमात पात्र ठरू शकते की नाही हे पाहणे उत्सुकतेचे ठरेल.
