MS Dhoni Loses Cool Ahead of Qualifier: महेंद्रसिंग धोनी रागात दिसला, भडकला असे चित्र क्वचितच घडलेले दिसते. परिस्थिती प्रतिकूल असो किंवा अनुकूल तो नेहमी शांत राहतो. त्यामुळे त्याला कॅप्टन कूल म्हटले जाते. मात्र, यापूर्वीही अशा अनेक घटना घडल्या आहेत की, धोनीचा संयम सुटला आहे. असाच काहीसा प्रकार शनिवारी आयपीएल २०२३मध्ये चेन्नई सुपर किंग्जच्या शेवटच्या लीग सामन्यादरम्यान पाहायला मिळाला, जेव्हा धोनी एका गोष्टीवरून अंपायरशी अडकला. त्याचा व्हिडिओ सोशल मीडियावर व्हायरल होत आहे. आता असे काय झाले की धोनी सामन्याच्या मध्यभागी अंपायरजवळ पोहोचला आणि त्याच्याशी वाद घालू लागला. चला जाणून घेऊया.
महेंद्रसिंग धोनी आणि फील्ड अंपायर याच्यात झालेल्या वादाची ही संपूर्ण घटना दिल्ली कॅपिटल्सच्या डावाच्या १४व्या षटकानंतर घडली. यावेळी दिल्लीने सामन्यात एक विजयी होण्यासाठी चेंडूचा मुद्दा काढला आणि कॅप्टन कूल भडकला. यादरम्यान धोनी चेंडूच्या आकाराबद्दल नाराज दिसला आणि त्याने अंपायरला चेंडू बदलण्याची मागणी केली. धोनीचे म्हणणे ऐकून अंपायरने चेंडू बदलला. पण, अंपायरने धोनीकडे सोपवलेल्या दुसऱ्या चेंडूवर तो खूश नव्हता.
चेंडू बदलाण्यावरून धोनी अंपायरवर भडकला
खरं तर, धोनीची इच्छा होती की चेंडू बदलण्याची वेळ आली आहे. असे झाले की ज्या चेंडूने सामना खेळला जात होता त्याचा आकार थोडासा बदलला होता आणि खूप जुना सुद्धा झाला होता. अशा स्थितीत धोनीने अंपायरला चेंडू बदलण्याचे आवाहन केले, जे अंपायरने मान्य केले. पण आणलेला दुसरा चेंडू जुन्या चेंडूपेक्षा अगदीच नवा होता. धोनीच्या मते काही षटके वापरलेला चेंडू आम्हाला मिळावा कारण, नवीन चेंडू त्या खेळपट्टीवर खेळणे खूप सोपे होते. त्यामुळे अंपायरच्या निर्णयावर तो भडकला आणि या लाइव्ह सामन्यातील व्हिडीओ सध्या सोशल मीडियावर व्हायरल होत आहे.
सामन्यानंतर धोनी काय म्हणाला?
दिल्ली कॅपिटल्सला पराभूत करून सीएसकेला प्लेऑफमध्ये प्रवेश मिळवून दिल्यानंतर एम.एस. धोनी माध्यमांशी बोलला. तो म्हणाला, “यशाला कोणताच पर्याय नसतो. पण आपल्या संघातील खेळाडूंवर विश्वास ठेवून आणि त्यांना सर्वोत्तम प्रदर्शनासाठी आत्मविश्वास देऊन हे साध्य करता येऊ शकते.” धोनीने आपल्या १४ आयपीएल हंगामांमध्ये १२व्या वेळी प्लेऑफसाठी पात्र ठरली आहे. आपल्या संघाला प्लेऑफमध्ये सातत्याने पोहोचवण्याविषयी देखील धोनीला प्रश्न विचारला गेला.
या प्रश्नावर थालाने उत्तर दिले की, “अशी कोणतीच पद्धत ठरलेली नाही. संघासाठी जे योग्य ते आम्ही सर्वोत्तम खेळाडू निवडतो आणि त्यांना खेळवतो. खेळाडू ज्याठिकाणी कमी पडतात, त्याठिकाणी त्यांच्याकडून सराव करून घेतो. संघ व्यवस्थापनालाही याचे श्रेय दिले पाहिजे. पण सर्वात महत्वाची भूमिका खेळाडूंचीच असते. खेळाडू नसतील, तर आम्हीही काहीच करू शकणार नाही. आम्ही खेळाडूंच्या वैयक्तिक प्रदर्शनावर लक्ष देत नाही, आम्ही फक्त संघाच्या प्रदर्शनावर लक्ष देत आहोत.”
