चेन्नई सुपर किंग्जचा कर्णधार महेंद्रसिंग धोनीबद्दल असे बोलले जात आहे की तो आयपीएलच्या चालू हंगामानंतर व्यावसायिक क्रिकेटमधून निवृत्ती घेणार आहे. माही पुढच्या मोसमापासून या स्पर्धेत खेळणार नाही, असे चाहते आणि क्रिकेट तज्ज्ञांना वाटत असले तरी धोनीच्या मनात काही वेगळेच आहे. बुधवारी (३ मे) लखनऊ सुपर जायंट्स विरुद्ध खेळल्या जाणाऱ्या सामन्यापूर्वी त्याने मोठे वक्तव्य केले.
नाणेफेकीच्या वेळी न्यूझीलंडचे समालोचक डॅनी मॉरिसनला त्याच्या निवृत्तीबद्दल विचारले असता धोनीने मजेशीर उत्तर दिले. तो हसला आणि म्हणाला, “हे तुम्ही ठरवले आहे की हे माझे नाही शेवटचे आयपीएल आहे. मी अजून याबाबत काहीही बोललेलो नाही.” धोनीच्या या विधानामुळे त्याचे चाहते खूप खूश झाले आहेत. चेन्नईचा कर्णधार पुढील हंगामात दिसू शकतो, अशी आशा आता चाहत्यांमध्ये आहे.
आजच्या सामन्यात धोनीने गोलंदाजी करण्याचा निर्णय घेतला
नाणेफेकीबद्दल बोलायचे झाले तर धोनीने लखनऊविरुद्ध नाणेफेक जिंकली. त्याने प्रथम गोलंदाजी करण्याचा निर्णय घेतला. नाणेफेकीदरम्यान धोनी म्हणाला की, “तुम्हाला मैदान, खेळपट्टी आणि परिस्थिती पाहावी लागेल.” दीपक चहर तंदुरुस्त असून आकाश सिंगच्या जागी संघात सामील झाल्याची माहितीही चेन्नईच्या कर्णधाराने दिली. दुसरीकडे, लखनऊ सुपर जायंट्सचे कर्णधारपद कृणाल पांड्याकडे आहे. जखमी केएल राहुलच्या जागी त्याला संघाची जबाबदारी सांभाळायची आहे.
धोनी म्हणाला होता- माझ्या करिअरचा शेवटचा टप्पा
धोनीने निवृत्तीबाबत वक्तव्य करण्याची ही पहिलीच वेळ नाही. यापूर्वी, सनरायझर्स हैदराबादविरुद्धच्या सामन्यानंतर त्याने शुक्रवारी (२१ एप्रिल) सांगितले की, “हा त्याच्या कारकिर्दीचा शेवटचा टप्पा आहे.” ४१ वर्षीय धोनीने स्वतः कबूल केले की त्याला त्याच्या कारकिर्दीच्या शेवटच्या टप्प्याचा आनंद घ्यायचा आहे. सध्याचा हंगाम धोनीचा शेवटचा आहे आणि आयपीएल २०२३ नंतर तो निवृत्ती जाहीर करेल अशी अटकळ बांधली जात होती. मात्र, आता या सर्व शक्यतांना त्याने पूर्णविराम दिला आहे? असे त्याच्या आजच्या विधानावरून वाटते.
माही आधी काय म्हणाला होता, “मी कितीही वेळ खेळलो तरी चालेल, पण हा माझ्या कारकिर्दीचा शेवटचा टप्पा आहे. त्याचा आनंद घेणे महत्त्वाचे आहे. दोन वर्षांनंतर चाहत्यांना इथे येऊन पाहण्याची संधी मिळाली आहे. इथे येऊन छान वाटतं. प्रेक्षकांनी आमच्यावर भरभरून प्रेम आणि आपुलकीचा वर्षाव केला आहे.” आज त्याने याच्या नेमकं विरुद्ध वक्तव्य केलं आहे.
धोनी उत्तरप्रदेश क्रिकेटकडून सन्मानित
या सामन्यात उत्तर प्रदेश क्रिकेट असोसिएशनने (UPCA) धोनीचाही गौरव केला. नाणेफेकीनंतर युपीसीए सदस्य आणि बीसीसीआयचे उपाध्यक्ष राजीव शुक्ला यांनी धोनीचा सत्कार केला. धोनी प्रथमच आयपीएल सामना खेळण्यासाठी लखनऊला आला आहे. तो आयपीएलमधील सर्वात यशस्वी कर्णधारांपैकी एक आहे. त्याने भारताला दोन वेळा विश्वचषक जिंकून दिला आहे. धोनीच्या नेतृत्वाखाली भारताने २००७ मध्ये टी२० विश्वचषक आणि २०११ मध्ये एकदिवसीय विश्वचषक जिंकला होता.
