IPL 2024 Mumbai Indians Viral Video : मुंबई इंडियन्सचा पुढील सामना दिल्ली कॅपिटल्सविरुद्ध आहे; जो दिल्लीतील अरुण जेटली स्टेडियमवर खेळवला जाईल. हार्दिक पंड्याच्या नेतृत्वाखाली मुंबई इंडियन्स संघ सध्याच्या सीझनमध्ये फक्त तीन सामने जिंकू शकला. त्यामुळे आता पुढील सर्व सामने जिंकले, तरच मुंबई इंडियन्स संघ आयपीएल २०२४ च्या प्लेऑफमध्ये एन्ट्री करू शकेल; अन्यथा संघावर आयपीएलमधून बाहेर पडण्याची नामुष्की ओढवणार आहे. त्यासाठी मुंबई इंडियन्स संघ सराव सत्रात जोरदार तयारी करीत आहे. मुंबई इंडियन्सने शुक्रवारी सोशल मीडियावर एक व्हिडीओ पोस्ट केला; ज्यात मुंबईचे फलंदाज दमदार शॉट्स खेळताना दिसतायत. पण, त्यांच्या याच शॉट्समुळे मुंबई इंडियन्सचे ४० हजारांचे नुकसान झालेय. ते कसे काय ते जाणून घेऊ…
मुंबई इंडियन्सने शेअर केलेल्या या व्हिडीओत मुंबई इंडियन्सचे फलंदाज टीम डेव्हिड आणि सूर्यकुमार यादव फलंदाजीचा सराव करताना दिसत आहेत. या दोन्ही फलंदाजांच्या शॉट्समुळे काही कॅमेरे तुटले. त्यामुळे फ्रँचायजीचे बरेच नुकसान झाले. फलंदाजांचे काही उत्कृष्ट शॉट्स व्हिडीओ कॅमेऱ्यात रेकॉर्ड करता यावेत यासाठी कॅमेरे जवळ ठेवण्यात आले होते. परंतु, त्यांच्या शॉट्समुळे ते कॅमेरेच तुटले. त्यामुळे फ्रँचायजीचे जवळपास ४० हजारांचे नुकसान झाले आहे.
व्हिडीओ शेअर करताना मुंबई इंडियन्सने कॅप्शनमध्ये लिहिले की, आम्हाला ही रील बनविण्यासाठी ४० हजार रुपये लागले. दरम्यान, या व्हिडीओवर युजर्सदेखील वेगवेगळ्या प्रतिक्रिया देत आहेत.
मुंबई इंडियन्सच्या आयपीएल २०२४ मधील कामगिरीवर बोलायचे झाल्यास, हा संघ आतापर्यंत झालेल्या आठ सामन्यांपैकी केवळ तीन सामने जिंकू शकलाय. त्यामुळे स्कोअरबोर्डवर तो आता आठव्या स्थानी आहे. त्यात ऋषभ पंतच्या नेतृत्वाखाली दिल्ली कॅपिटल्स नऊपैकी चार सामने जिंकून सहाव्या स्थानी आहे.
जर मुंबई इंडियन्सला हरविण्यात यश मिळाले, तर दिल्लीचा संघ सर्वोत्तम चार संघांमध्ये स्थान मिळवू शकेल. कर्णधार ऋषभ पंत उत्कृष्ट फॉर्ममध्ये असून, संघाने अनेक सामने गमावले असले तरी संघ प्लेऑफच्या शर्यतीत कायम आहे.