CSK CEO Kasi Vishwanath with Shashank Singh Video : आयपीएल २०२४ मध्ये पंजाबची कामगिरी काही विशेष झाली नाही. संघाचा कर्णधार शिखर धवन दुखापतीमुळे संघाबाहेर आहे. शिखरच्या अनुपस्थितीत सॅम करन पंजाबचे नेतृत्व करत आहे. पंजाबची फलंदाजीही कमकुवत झाली आहे पण संघाकडे एक असा खेळाडू आहे. जो प्रत्येक सामन्यात संघाला अडचणीतून बाहेर काढत आहे. तो म्हणजे शशांक सिंग. जो यंदाच्या हंगामात कमी सामन्यात आपली छाप सोडण्यात यशस्वी झाला आहे. त्याने आपल्या स्फोटक फलंदाजीने सर्वांचे लक्ष वेधून घेतले आहे. आता शशांकचा सीएसकेच्या सीईओबरोबरचा व्हिडीओ व्हायरल झाल्याने, तो २०२५ मध्ये सीएसकेत जाणार, अशी अटकळ बांधली जात आहे.
सध्या सोशल मीडियावर एक व्हिडीओ क्लिप व्हायरल होत आहे. ज्यामध्ये शशांक सिंग सामन्यानंतर चेन्नई सुपर किंग्जचे सीईओ कासी विश्वनाथ यांच्यासोबत दिसत आहे. क्लिपमध्ये सीएसकेचे सीईओ शशांकला मिठी मारून त्याच्याशी बोलत आहे. यानंतर वेगवेगळे अंदाज बांधले जात आहेत. सीएसकेला शशांक सिंगमध्ये रस असल्याचे मानले जात आहे. हे देखील शक्य आहे की जर पंजाबने आयपीएल २०२४ मध्ये शशांक सिंगला कायम ठेवले नाही, तर सीएसके आयपीएल २०२५ च्या महा लिलावात शशांक सिंगला खरेदी करू शकते.
आयपीएल २०२४ मधील शंशाक सिंगची कामगिरी –
सध्या, शशांक सिंग आयपीएल २०२४ मध्ये त्याच्या कारकिर्दीतील सर्वोत्तम टप्प्यातून जात आहे. पंजाबकडून खेळणाऱ्या शशांक सिंगने ६ सामन्यात ७२ च्या सरासरीने २८८ धावा केल्या आहेत. ज्यामध्ये २ अर्धशतकांचाही समावेश आहे. या हंगामात शशांक सिंग पंजाबसाठी संकटमोचकची भूमिका पार पडत आहे. याआधी शशांक सिंग सनरायझर्स हैदराबाद फ्रँचायझीचा भाग होता. मात्र हैदराबादमध्ये त्याला फारशा संधी मिळाल्या नाहीत.
पंजाबची किंग्जची आयपीएलमधील कामगिरी –
गेल्या काही हंगामांप्रमाणे यंदाही पंजाबचा हा हंगाम फारसा खास राहिला नाही. संघात स्टार खेळाडू कमी आहेत. त्याचबरोबर संघाचा कर्णधार शिखर धवन दुखापतीमुळे संघाबाहेर आहे. त्यामुळे पंजाबच्या फलंदाजांनाही धावा करण्यात अपयश येत आहे. बहुतांश सामन्यांमध्ये पंजाबची धावगती खूपच कमी राहिली आहे. पण गेल्या दोन सामन्यांत पंजाबने कमाल केली. पंजाबने २६ एप्रिल रोजी कोलकाताविरुद्ध खेळल्या गेलेल्या हाय स्कोअरिंग सामन्यात कोलकाताचा ८ गडी राखून पराभव करून या मोसमातील सर्वोच्च धावसंख्येचा पाठलाग करण्याचा विक्रम केला.
हेही वाचा – वनडे आणि ट्वेन्टी२० प्रकारात टीम इंडिया अव्वल; आयसीसीची वार्षिक क्रमवारी जाहीर
केकेआरच्या २६१ धावांच्या प्रत्युत्तरात पंजाबने १८.४ षटकांत २ बाद २६२ धावा करत सामना जिंकला. यानंतर १ मे रोजी झालेल्या सामन्यात पंजाबने चेन्नईला त्यांच्या घरच्या मैदानावर पराभूत करून सर्वांना आश्चर्यचकित केले. पंजाबने हा सामना ७ विकेटने जिंकला. ज्यामध्ये शशांक सिंगने नाबाद २५ धावा करून संघाला विजय मिळवून दिला.
