Rajat Patidar Ruled Out IPL 2023: आयपीएलच्या १६व्या हंगामात रॉयल चॅलेंजर्स बंगळुरूच्या संघाला मोठा धक्का बसला आहे. कारण त्यांचा फलंदाज रजत पाटीदार आता दुखापतीमुळे आयपीएल २०२३ च्या संपूर्ण हंगामातून बाहेर पडला आहे. आरसीबीने आपल्या अधिकृत ट्विटर हँडलवरून ही माहिती दिली आहे. पाटीदारचा बाहेर पडणे हा बंगळुरू संघासाठी मोठा धक्का मानला जात आहे. कारण गेल्या मोसमात त्याने आपल्या फलंदाजीने संघासाठी अतिशय महत्त्वाची भूमिका बजावली होती.
रॉयल चॅलेंजर्स बंगळुरूने केलेल्या ट्विटमध्ये सांगितले की, टाचेच्या दुखापतीमुळे रजत पाटीदार या संपूर्ण हंगामात खेळू शकणार नाही. त्यांनी पुढे लिहिले की, दुर्दैवाने रजत पाटीदार दुखापतीमुळे या संपूर्ण हंगामातून बाहेर पडला आहे. तो लवकर बरे व्हावे अशी आमची इच्छा आहे. या काळात त्याला फ्रँचायझीकडून पूर्ण पाठिंबा दिला जाईल. प्रशिक्षक आणि संघ व्यवस्थापनाने निर्णय घेतला आहे की, सध्या आम्ही रजतच्या बदली खेळाडूचे नाव जाहीर करणार नाही.
प्लेऑफमध्ये शतक झळकावणारा पहिला अनकॅप्ड खेळाडू –
रॉयल चॅलेंजर्स बंगळुरु संघाला आशा होती की मध्य प्रदेशातील २९ वर्षीय फलंदाज आयपीएल २०२३ मध्ये खेळण्यासाठी उपलब्ध होईल. परंतु आता त्याला मोठा धक्का बसला आहे. आयपीएल २०२२ मध्ये रजत पाटीदार बदली खेळाडू म्हणून संघात सामील झाला होता. त्याने शानदार फलंदाजी करत १५० च्या स्ट्राईक रेटने ३३३ धावा केल्या. एलिमिनेटरमध्ये शतक झळकावून, तो आयपीएल प्लेऑफमध्ये शतक झळकावणारा पहिला अनकॅप्ड खेळाडू ठरला होता. यानंतर, त्याचा देशांतर्गत हंगामही चांगला गेला.
रजत पाटीदारच्या जागी फ्रँचायझीने अद्याप घोषणा केलेली नाही. संघाचा पुढील सामना ६ एप्रिल रोजी कोलकाता नाईट रायडर्सविरुद्ध आहे. फाफ डुप्लेसिसच्या नेतृत्वाखालील संघ खेळाडूंच्या दुखापतीमुळे त्रस्त आहे. ऑस्ट्रेलियन वेगवान गोलंदाज जोश हेजलवूड देखील दुखापतग्रस्त असून तो अद्याप भारतात आलेला नाही. मुंबई इंडियन्सविरुद्ध रीस टोपली जखमी झाला होता.
हेही वाचा – IPL 2023: विराट कोहलीने लिहिली फक्त ‘या’ ८ शब्दांवर कविता, जी तुम्हालाही करेल प्रेरित; पाहा VIDEO
जर आपण रजत पाटीदारच्या आयपीएल रेकॉर्डवर नजर टाकली तर त्याने आतापर्यंत १२ सामने खेळले आहेत, ज्यामध्ये त्याने ४०.४ च्या सरासरीने एकूण ४०४ धावा केल्या आहेत. ज्यात एक शतक आणि दोन अर्धशतकांचा समावेश आहे.