Rashid Khan and Alzari Joseph’s partnership: आयपीएल २०२३चा ५७ वा सामना शुक्रवारी वानखेडे स्टेडियमवर मुंबई इंडियन्स आणि गुजरात टायटन्स यांच्यात खेळला गेला. या सामन्यात मुंबईने गुणतालिकेत अव्वल स्थानावर असलेल्या गुजरातचा २७ धावांनी पराभव केला. मुंबईसाठी सूर्यकुमार यादवने दमदार शतक झळकावत मोलाचे योगदान दिले. त्याचबरोबर राशिद खानने गुजरात संघाला विजय मिळवून देण्यासाठी प्रयत्न केले पण तो अपयशी ठरला. दरम्यान राशिद खानने आपल्या आयपीएल कारकिर्दीतील सर्वोत्कृष्ट ७९ धावांची खेळी खेळली आणि अल्झारी जोसेफसोबत भागीदारी करून विशेष कामगिरी केली.
राशिद खान आणि अल्झारी जोसेफ यांनी आयपीएलच्या इतिहासात ९व्या विकेटसाठी केलेली सर्वोच्च भागीदारी ठरली आहे. राशिद आणि गुजरातच्या जोसेफ यांनी मुंबई इंडियन्सविरुद्ध ९व्या विकेटसाठी ८८* धावांची भागीदारी केली. याआधी हा विक्रम सीएसकेच्या सॅम करण आणि इम्रान ताहिर यांच्या नावावर होता, ज्यांनी ९व्या विकेटसाठी ४३ धावांची भागीदारी केली. या यादीत रविचंद्रन अश्विन आणि एमएस धोनीची जोडी तिसऱ्या स्थानावर आहे. सीएसकेच्या धोनी-अश्विनने ४१ धावांची भागीदारी केली होती.
टी-२० क्रिकेटमध्ये ९व्या विकेटसाठी दुसरी सर्वोच्च भागीदारी –
तसे, राशिद खान आणि अल्झारी जोसेफ पुरुषांच्या टी-२० क्रिकेटमध्ये ९व्या विकेटसाठी दुसरी सर्वोच्च भागीदारी केली आहे. पुरुषांच्या टी-२० क्रिकेटमध्ये ९व्या विकेटसाठी सर्वात मोठ्या भागीदारीचा विक्रम बेल्जियमच्या साबर जाखिल आणि सकलेन अलीच्या नावावर आहे. साबेर जाखील आणि सकलेन अली यांनी २०२२ मध्ये वॉटरलू येथे ऑस्ट्रियाविरुद्ध ९व्या विकेटसाठी नाबाद १३२* धावांची भागीदारी केली. राशिद आणि जोसेफ या जोडीने वेस्ट इंडिजच्या अकील हुसेन-रोमारियो शेफर्ड आणि पार्टेक्स स्पोर्टिंग क्लबच्या इशरुल इस्लाम आणि जैनुल इस्लाम या जोडीला मागे टाकले आहे.
पुरुषांच्या टी-२० क्रिकेटमध्ये ९व्या विकेटसाठी तिसरी सर्वोच्च भागीदारी पार्टेक्स स्पोर्टिंग क्लबच्या इशरुल इस्लाम आणि जैनुल इस्लाम यांच्यात होती. या दोघांनी २०२१ मध्ये सावर येथे एल रूपगंज विरुद्ध ७३धावांची नाबाद भागीदारी केली होती. वेस्ट इंडिजचा अकिल हुसेन आणि रोमॅरियो शेफर्ड ही जोडी या यादीत चौथ्या स्थानावर आहे. या जोडीने २०२२ मध्ये बार्बाडोस येथे इंग्लंडविरुद्ध ९व्या विकेटसाठी नाबाद ७२ धावांची भागीदारी केली होती.
सामन्याबद्दल बोलायचे, तर गुजरात टायटन्सला मुंबई इंडियन्सकडून दारूण पराभवाला सामोरे जावे लागले. मुंबईने प्रथम फलंदाजी करताना २० षटकांत ५ गडी गमावून २१८ धावा केल्या होत्या. प्रत्युत्तरात गुजरात टायटन्सला २० षटकांत ८ गडी गमावून १९१ धावा करता आल्या. राशिद खानने अवघ्या ३२ चेंडूंत तीन चौकार आणि १० षटकारांच्या मदतीने नाबाद ७९ धावा केल्या.
