PBKS vs KKR: “चहलची फिटनेस टेस्ट झाली…”, पॉन्टिंगने सामन्यानंतर केला मोठा खुलासा; म्हणाला, “त्याने सांगितलं मी तयार आहे अन् करून दाखवलं…”

पॉन्टिंगने सामन्यानंतर बोलताना आपल्या भावना व्यक्त केल्या. ते म्हणाले, “माझं हृदय अजूनही वेगाने धडधडतं आहे. माझ्या वयाच्या माणसांसाठी असे सामने फारसे बरे नाहीत. दोन दिवसांपूर्वी आम्ही २४५ धावांचा बचाव करू शकलो नव्हतो. पण हा लो स्कोअरिंग थ्रिलर सामना होता”.

चहलच्या कामगिरीचं त्यांनी मनापासून कौतुक केलं. ते म्हणाले, “चहलची कामगिरी अफलातून होती. सामन्याआधी त्याने फिटनेस टेस्ट दिली. मागच्या सामन्यात त्याच्या खांद्याला दुखापत झाली होती. म्हणून मी त्याला सामन्याआधी विचारलं की तुझी तब्येत नीट आहे ना? त्याने सांगितलं, कोच मी खेळण्यासाठी तय्यार आहे. त्याची कामगिरी पाहिली तर तो किती तय्यार होता याचा प्रत्यय येतो. आजचा सामना हरलो असतो तरी ज्या पद्धतीने आम्ही संघर्ष केला, झुंजारपणा दाखवला त्याकरता खेळाडूंचा अभिमानच वाटला असता”.

“बॅटिंगमध्ये आम्ही कमी पडलो पण बॉलिंगमध्ये उट्टं भरून काढलं. माझ्या मते पंजाब संघासाठी हंगामातला सर्वोत्तम विजय ठरावा. अटीतटीच्या लढतीत आम्ही थरारक विजय मिळवला आहे. मध्यंतरावेळी आम्ही जिंकू यावर जगभरातल्या क्रिकेटप्रेमींपैकी कोणी विश्वास ठेवला नसता पण आम्ही करून दाखवलं. प्रशिक्षक म्हणून माझ्यासाठी हा आतापर्यंतचा शानदार विजय आहे”, असं पॉन्टिंग यांनी सांगितलं.

या दिमाखदार विजयाचं सेलिब्रेशन व्हायला हवं असं समालोचकांनी विचारताच पॉन्टिंग यांनी तात्काळ सांगितलं की, ‘नक्कीच सेलिब्रेशन असेल. खेळाडू कदाचित लवकर झोपायला जातील पण मी जाणार नाही. तुम्हीही आमच्यात हॉटेलात आहात, तुम्हालाही पार्टीचं निमंत्रण आहे. धमाकेदार विजयाचा आनंद साजरा करू’.