Five Sixes in an Over in IPL: आयपीएल २०२३ मध्ये रविवारी केकेआरकडून खेळताना २५ वर्षीय फलंदाज रिंकू सिंगने ख्रिस गेलसह आयपीएल रेकॉर्ड बुकमध्ये आपले नाव कोरले. रिंकूने शेवटच्या ५ चेंडूत ५ षटकार मारत कोलकाताला अविश्वसनीय विजय मिळवून दिला. कोलकाताला शेवटच्या षटकात गुजरात टायटन्सविरुद्ध विजयासाठी २९ धावा करायच्या होत्या. अशा स्थितीत दुसऱ्या चेंडूवर स्ट्राईकवर पोहोचलेल्या रिंकूने धुमाकूळ घातला. त्याने २०व्या षटकांत यश दयालच्या शेवटच्या पाच चेंडूंवर पाच षटकार ठोकत आपल्या संघाला संस्मरणीय विजय मिळवून दिला.
आयपीएलच्या विशेष क्लबमध्ये केला प्रवेश –
यासह रिंकूने आयपीएलमध्ये एका षटकात पाच षटकार मारणाऱ्या खेळाडूंच्या यादीत आपले नाव नोंदवले आहे. आयपीएलच्या इतिहासात हा पराक्रम २०१२ मध्ये युनिव्हर्स बॉस म्हणून ओळखल्या जाणाऱ्या ख्रिस गेलने केला होता. आठ वर्षांनंतर राहुल तेवतियाने शारजाहमध्ये पंजाब किंग्जविरुद्ध शेल्डन कॉट्रेलच्या पराक्रमाची पुनरावृत्ती केली होती. २०२१ मध्ये रवींद्र जडेजाही एका षटकात पाच षटकार मारून या खास आयपीएल क्लबमध्ये सामील झाला होता. आता रिंकू सिंगनेही या क्लबमध्ये प्रवेश केला आहे.
एक वर्षापूर्वीची जुनी चूक सुधारत ७ चेंडूत ४० धावा केल्या –
वर्षभरापूर्वी, रिंकू सिंगने लखनऊ सुपर जायंट्सविरुद्ध शेवटच्या षटकात १५ चेंडूत ४० धावांची खेळी केली पण संघाला विजयाचा उंबरठा ओलांडता आला नाही. पण वर्षभरानंतर गुजरातविरुद्ध ती चूक सुधारत रिंकूने २१ चेंडूंत ४८ धावांची नाबाद खेळी खेळून संघाला विजय मिळवून दिला. शेवटच्या ७ चेंडूत त्याने ४० धावा (६,४,६,६,६,६,६) करत संघाला विजय मिळवून दिला.
विजयासाठी ६ चेंडूंत २९ धावांची आवश्यकता असताना खेळपट्टीवर उमेश यादव (नाबाद ५) आणि रिंकू ही जोडी एकत्र होती. विजय आवाक्याबाहेर होता. पण, रिंकूने आपला आवाका दाखवून देत सर्वाना अवाक केले. उमेशने पहिल्या चेंडूवर एक धाव काढून रिंकूला खेळायला दिले. रिंकूने त्यानंतर यशच्या पाच चेंडूंवर टोलेबाजी करताना चेंडूला स्टेडियमची सफर घडवून आणली. सलग पाच षटकार ठोकत रिंकूने कोलकाताचा अशक्य वाटणारा विजय साकार केला.