Chennai Super Kings vs Mumbai Indians Match Updates: आयपीएल २०२३ च्या ४९व्या सामन्यात चेन्नई सुपर किंग्ज मुंबई इंडियन्स आमनेसामने आले आहेत. या सामन्यात सीएसकेने नाणेफेक जिंकून प्रथम गोलंदाजी करण्याचा निर्णय घेतला. त्यामुळे सर्वांना वाटतं होते की, आता मुंबईच्या डावाची सुरुवात नेहमीप्रमाणे रोहित शर्मा आणि इशान किशन करतील. पण असे झाले नाही, कारण रोहितने त्याच्याऐवजी कॅमेरुन ग्रीनला सलामी पाठवले. पण त्याची रणनीती यशस्वी झाली नाही. त्याचबरोबर रोहित शर्माच्या नावावर एका लाजिरवाण्या विक्रमाची नोंद झाली.
या सामन्यात सलामीवीर म्हणून कॅमेरून ग्रीन ६ धावा करून बाद झाला, तर तिसऱ्या क्रमांकावर फलंदाजीला आलेला कर्णधार रोहित शर्माही शून्यावर बाद झाला. या सामन्यात रोहित शर्माला दीपक चहरने बाद केले. यापूर्वीच्या सामन्यातही हिटमॅन शून्यावर बाद झाला होता. त्यामुळे रोहित शर्माच्या नावावर आयपीएल इतिहासातील एका लाजिरवाण्या विक्रमाची नोंद झाली आहे.
हिटमॅन आयपीएलमध्ये सर्वाधिक वेळा शून्यावर बाद होणारा फलंदाज ठरला –
गेल्या काही सामन्यांमध्ये रोहित शर्मा धावा करू शकला नाही, त्यामुळे त्याने सीएसकेविरुद्ध फलंदाजीची स्थिती बदलण्याचा निर्णय घेतला, परंतु त्याची रणनीती यशस्वी झाली नाही आणि दीपक चहरच्या चेंडूवर तो खराब शॉट खेळून झेलबाद झाला. आयपीएलमध्ये तो शून्यावर आऊट होण्याची ही १६वी वेळ आहे. या लीगमध्ये तो शून्यावर आऊट होण्याच्या बाबतीत पहिल्या क्रमांकावर आला आहे. त्याने दिनेश कार्तिक, सुनील नरेन आणि मनदीप सिंग यांना मागे टाकले. या लीगमध्ये तिघेही १५-१५ वेळा शून्यावर बाद झाले आहेत.
रोहित शर्माने गौतम गंभीरचा विक्रम मोडला –
रोहित शर्मा आता आयपीएलमध्ये कर्णधार म्हणून सर्वाधिक वेळा शून्यावर बाद होणारा फलंदाज ठरला आहे. कर्णधार म्हणून तो या लीगमध्ये ११व्यांदा शून्यावर आऊट झाला. त्याचबरोबर रोहितने गौतम गंभीरला मागे टाकले आहे. आयपीएलमध्ये कर्णधार म्हणून गौतम गंभीर १० वेळा शून्यावर बाद झाला होता.
दीपक चहरविरुद्ध रोहितची नेहमीच उडाली तारांबळ –
आयपीएलमध्ये दीपक चहरविरुद्ध रोहित शर्माची बॅट नेहमीच शांत राहिली आहे. त्याने आतापर्यंत दीपक चहरच्या ४९ चेंडूंचा सामना केला आहे, ज्यात त्याने ६० धावा केल्या आहेत आणि तीनदा तो बाद झाला आहे. २० डॉट बॉल्स खेळताना त्याने दीपकच्या चेंडूंवर ९ चौकार मारले आहेत आणि त्याचा स्ट्राइक रेट १२२.४४ राहिला आहे.
