Sandeep Sharma taking an amazing catch of Suryakumar Yadav: आयपीएल २०२३ मध्ये चाहत्यांना एकाहून एक तुफानी फलंदाज आणि एकाहून एक गोलंदाज पाहायला मिळत आहेत. प्रत्येक सामन्याबरोबर एक नवीन नाव समोर येत असून जे रातोरात प्रसिद्ध होत आहे. राजस्थान रॉयल्सच्या बाबतीतही असेच काहीसे घडले आहे. रविवारी त्यांचा सामना मुंबई इंडियन्सशी झाला. या सामन्यात संदीपने त्याच्या गोलंदाजीमुळे नव्हे तर त्याच्या उत्कृष्ट क्षेत्ररक्षणामुळे वर्चस्व गाजवले. त्याच्या उत्तम क्षेत्ररक्षणाचा व्हिडीओ आता व्हायरल होत आहे. सूर्यकुमार यादव रविवारी उत्कृष्ट फॉर्ममध्ये दिसत होता. त्याची फलंदाजी पाहून मुंबई संघ २१३ धावांचे लक्ष्य सहज गाठेल असे वाटत होते, पण संदीप शर्माने त्याचा अप्रतिम झेल घेत, आपल्या संघाला सामन्यात पुनरागमन करुन दिले. सूर्यकुमार यादव ५५ धावांवर बाद झाला. संदीप शर्माने सूर्याचा घेतला शानदार झेल - ट्रेंट बोल्ट १६व्या षटकात गोलंदाजी करत होता. चौथ्या चेंडूवर सूर्यकुमार यादवने फाईन लेगवर मोठा शॉट खेळण्याचा प्रयत्न केला, पण चेंडू त्याला नीट टाईम करता आला नाही. त्यामुळे चेंडू दूर जाण्याऐवजी हवेत उंच गेला. त्यानंतर संदीप शर्माने १९ मीटर मागे धावत जाऊन हवेत झेप मारली आणि झेल घेतला. चेंडू हातात येताच संदीप जमिनीवर जोरात आदळला. असे होऊनही त्याच्या हातातून चेंडू पडला नाही. हा झेल पाहून केवळ संदीपचा सहकारी खेळाडू नव्हे, तर सूर्यकुमार यादवही हैराण झाला. ज्याचा व्हिडीओ व्हायरल होत आहे. संदीप शर्मामुळे कपिल देव यांची आली आठवण - या झेलने चाहत्यांना कपिल देव यांची आठवण करून दिली. १९८३ च्या विश्वचषकात कपिल देवने या पद्धतीने मागे धावत जाऊन झेल पकडला होता. त्या झेलने टीम इंडियाला वर्ल्ड चॅम्पियन बनवले. मात्र, संदीप शर्माचा झेल त्यांच्या संघाला विजय मिळवून देऊ शकला नाही. मुंबईने शेवटच्या षटकापर्यंत गेलेला सामना शानदार पद्धतीन जिंकला. मुंबईला शेवटच्या षटकात १७ धावांची गरज होती आणि टीम डेव्हिडने पहिल्या तीन चेंडूत षटकारांची हॅट्ट्रिक करत हे काम पूर्ण केले. हेही वाचा - IPL 2023 MI vs RR: यशस्वी जैस्वालने ऐतिहासिक सामन्यात रचला इतिहास; ‘ही’ कामगिरी करणारा ठरला पहिलाच खेळाडू सामन्याबद्दल बोलायचे तर आयपीएलच्या १००० व्या सामन्यात राजस्थान रॉयल्सने प्रथम फलंदाजी करताना ७ विकेट गमावत २१२ धावा केल्या. प्रत्युत्तरात मुंबईने १९.३ षटकांत २१४ धावा करत सामना जिंकला. मुंबईसाठी टीम डेव्हिडने २० व्या षटकातील पहिल्या तीन चेंडूत सलग तीन षटकार मारून सामना संपवला. राजस्थानसाठी यशस्वी जैस्वालची १२४ धावांची खेळी व्यर्थ गेली. त्याचवेळी मुंबईकडून सूर्यकुमार यादवने ५५धावा केल्या. त्यांच्याशिवाय टीम डेव्हिडने ४५ आणि कॅमेरून ग्रीनने ४४धावा केल्या.
