Vaibhav Suryavanshi: आयपीएल २०२५ चा उत्साह आता शिगेला पोहोचला असून, गेल्या काही दिवसांपासून सर्वांचे लक्ष १४ वर्षीय वैभव सूर्यवंशीवर आहे, ज्याने गुजरात टायटन्स विरुद्ध राजस्थान रॉयल्सकडून खेळताना इतिहास रचला. बिहारच्या या तरुण फलंदाजाने फक्त ३५ चेंडूत शतक झळकावले आणि आयपीएलमध्येच नव्हे तर टी-२० क्रिकेटमध्येही सर्वात कमी वयात शतक झळकावण्याचा विक्रम केला.
या शानदार कामगिरीने वैभव सूर्यवंशीने सर्वांचे लक्ष वेधून घेतले असून, लखनौ सुपर जायंट्सचे मालक संजीव गोयंका देखील वैभवचे कौतुक करण्यापासून स्वतःला रोखू शकले नाहीत. त्यांनी सोशल मीडियावर वैभवचा जुना फोटो शेअर केला आणि त्याचे आभार मानले आहेत.
वैभवच्या या ऐतिहासिक खेळीने लखनौ सुपर जायंट्सचे मालक संजीव गोयंका यांचे मन जिंकले आहे. गोयंका यांनी त्यांच्या एक्स सोशल मीडिया हँडलवर वैभनचा एक जुना फोटो शेअर केला आहे, ज्यामध्ये २०१७ मध्ये ६ वर्षांचा वैभव त्यांच्या तत्कालीन फ्रँचायझी रायझिंग पुणे सुपरजायंटसाठी चिअर करताना दिसत आहे.
माझ्या रायझिंग पुणे सुपरजायंट्ससाठी…
वैभवच्या या फोटोसोबत गोयंका यांनी लिहिले आहे की, “काल रात्री वैभवची खेळी पाहूण मला आश्चर्य झाले. आज सकाळी मला २०१७ मध्ये माझ्या तत्कालीन रायझिंग पुणे सुपरजायंट्स संघासाठी ६ वर्षांचा वैभव सूर्यवंशी चिअर करतानाचा हा फोटो सापडला. धन्यवाद, वैभव. खूप खूप शुभेच्छा.”
गुजरातकडून २१० धावांचे आव्हान
२८ एप्रिल २०२५ रोजी जयपूरच्या सवाई मानसिंग स्टेडियमवर राजस्थान रॉयल्स आणि गुजरात टायटन्स यांच्यातील सामन्यात वैभव सूर्यवंशीने आपल्या फलंदाजीने क्रिकेट जगताचे लक्ष आपल्याकडे वेधून घेतले. प्रथम फलंदाजी करताना गुजरात टायटन्सने २०९ धावांचा डोंगर उभा केला, ज्यामध्ये शुभमन गिल (८४) आणि जोस बटलर (२६ चेंडूत अर्धशतक) यांचे महत्त्वपूर्ण योगदान होते.
राजस्थानच्या सलामीवीरांची वादळी खेळी
प्रत्युत्तरादाखल, वैभवने राजस्थान रॉयल्सकडून ३५ चेंडूत १०१ धावांची स्फोटक खेळी केली. या खेळी दरम्यान वैभव आयपीएलमध्ये सर्वात वेगवान शतक करणारा भारतीय फलंदाज ठरला. त्याच्या खेळीमुळे राजस्थानने १५.५ षटकांत ८ गडी गमावून २१० धावांचे लक्ष्य गाठले. यावेळी वैभवला त्याचा सलामीच्या जोडीदार यशस्वी जयस्वालचीही उत्तम साथ लाभली. जयस्वालने ४० चेंडूत ७० धावांची शानदार खेळी केली.
