Sanju Samson breaks Shane Warne’s record : आयपीएलच्या १७व्या हंगामातील ६१ वा सामना चेन्नई सुपर किंग्ज आणि राजस्थान रॉयल्स संघात खेळला गेला. या सामन्यात राजस्थान रॉयल्सचा कर्णधार संजू सॅमसनने नाणेफेक जिंकून चेन्नई सुपर किंग्जविरुद्ध प्रथम फलंदाजी करण्याचा निर्णय घेतला. सीएसकेविरुद्धच्या सामन्यात नाणेफेक होताच, संजू सॅमसनने एक मोठा विक्रम आपल्या नावावर केला आहे. त्याने शेन वॉर्नला मागे टाकले आहे. आयपीएल २०२४ च्या प्लेऑफमध्ये पोहोचण्यासाठी राजस्थान रॉयल्ससाठी हा सामना जिंकणे खूप महत्वाचे आहे.
संजू सॅमसन आयपीएल २०२१ पासून राजस्थान रॉयल्सचे नेतृत्व करत आहे. चेन्नई सुपर किंग्जविरुद्धच्या सामन्यात नाणेफेक होताच, तो सर्वाधिक सामन्यांमध्ये राजस्थान रॉयल्सचे नेतृत्व करणारा खेळाडू ठरला आहे. संजू सॅमसनने ५७ सामन्यात राजस्थान रॉयल्सचे नेतृत्व केले आहे. जे इतर कर्णधारांच्या तुलनेत सर्वाधिक आहे. या बाबतीत संजूने शेन वॉर्न आणि राहुल द्रविडसारख्या दिग्गज खेळाडूंना मागे टाकले आहे. शेन वॉर्नने ५६ सामन्यांमध्ये राजस्थान रॉयल्सचे नेतृत्व केले आहे. तर राहुल द्रविडने ४० सामन्यांमध्ये राजस्थान रॉयल्सचे नेतृत्व केले आहे.
सर्वाधिक सामन्यांमध्ये राजस्थान रॉयल्सचे नेतृत्व करणारे खेळाडू:
संजू सॅमसन- ५७ सामने
शेन वॉर्न- ५६ सामने
राहुल द्रविड- ४० सामने
स्टीव्ह स्मिथ- २७ सामने
अजिंक्य रहाणे- २४ सामने
संजूच्या नेतृत्वाखाली राजस्थान रॉयल्सची कामगिरी –
संजू सॅमसनच्या नेतृत्वाखाली राजस्थान रॉयल्स संघाने ३० सामने जिंकले आहेत. त्याचबरोबर संघाला २६ सामन्यांत पराभवाचा सामना करावा लागला आहे. तो मैदानावर शांत राहतो आणि गोलंदाजीत योग्य बदल करतो. त्याच्याच नेतृत्वाखाली राजस्थान रॉयल्स संघाने आयपीएल २०२२ मध्ये अंतिम फेरी गाठली होती. जिथे गुजरात टायटन्सविरुद्ध संघाचा पराभव झाला होता.
आजच्या सामन्याबद्दल बोलायचे तर, सिमरजित सिंग आणि तुषार देशपांडे यांच्या शानदार गोलंदाजीच्या जोरावर चेन्नई सुपर किंग्जने राजस्थान रॉयल्सला २० षटकांत ५ गड्यांच्या मोबदल्यात १४१ धावांवर रोखले.
हेही वाचा – CSK vs RR : एमएस धोनीचा चेन्नईत शेवटचा IPL सामना? CSK च्या ‘त्या’ पोस्टने चाहत्यांची वाढली धाकधूक
राजस्थानकडून रियान परागने ३५ चेंडूंत एक चौकार आणि तीन षटकारांच्या मदतीने नाबाद ४७ धावा केल्या. चेन्नईकडून सिमरजीतने तीन, तर तुषारने शेवटच्या षटकात दोन बळी घेतले. मात्र, या सामन्यात राजस्थानची फलंदाजी खूपच खराब झाली. संघाचे फलंदाज सुरुवातीपासूनच धावा काढण्यासाठी धडपडताना दिसले. चेन्नईसाठी सिमरजीत सिंगने शानदार गोलंदाजी केली आणि राजस्थानला सुरुवातीचा धक्का दिला, ज्यामुळे त्याच्या इतर फलंदाजांवर दबाव वाढला. यातून राजस्थानचे फलंदाज शेवटपर्यंत सावरले नाहीत आणि १५० धावाही करू शकले नाहीत.