Sunrisers Hyderabad vs Royal Challengers Bangalore Match Updates: आयपीएल २०२३ मधील ६५ वा सामना सनरायझर्स हैदराबाद आणि रॉयल चॅलेंजर्स बंगलुरु संघात खेळला गेला आहे. या सामन्यात आरसीबीने हैदराबादचा ८ गडी राखून पराभव केला. हैदराबादने प्रथम फलंदाजी करताना हेनरिक क्लासेनने झंझावाती शतकाच्या जोरावर २० षटकांत ५ बाद १८६ धावा केल्या होत्या. प्रत्युत्तरात आरसीबीने विराट कोहलीच्या दमदार शतकाच्या १९.२ षटकात १८७ धावा करत विजय नोंदवला. आरसीबीने दणदणीत विजय मिळवत गुणतालिकेत अव्वल ४ मध्ये प्रवेश केला आहे. त्यानी आतापर्यंत १३सामने खेळले असून या कालावधीत त्याने ७सामने जिंकले आहेत. बेंगळुरूला ६सामन्यांत पराभवाचा सामना करावा लागला आहे. त्याचे १४ गुण झाले आहेत. कोहलीच्या शानदार शतकाच्या जोरावर बंगळुरूचा विजय - विराट कोहलीने ६२ चेंडूत आपले शतक पूर्ण केले आहे. मात्र, शतक झळकावल्यानंतर पुढच्याच चेंडूवर तो बाद झाला. कोहलीने ६३ चेंडूत १०० धावांची खेळी केली. त्याने १२ चौकार आणि चार षटकार मारले. त्याचे आयपीएलमधील हे सहावे शतक आहे. त्याने ख्रिस गेलच्या शतकांच्या विक्रमांशी बरोबरी केली आहे. त्याचबरोबर कर्णधार फाफ डू प्लेसिस सोबत पहिल्या विकेटसाठी १७२ धावांची भागीदारी रचली. फाफ डू प्लेसिसनेही ४७ चेंडूत ७१ धावांचे योगदान दिले. प्लेसिसने ७ चौकार आणि २ षटकार मारले. अखेरीस ग्लेन मॅक्सवेल ५ धावा आणि ब्रेसवेल ४धावा करून नाबाद राहिला. हैदराबादच्या डावात क्लासेनचे धमाकेदार शतक - नाणेफेक गमावल्यानंतर प्रथम फलंदाजी करताना क्लासेनने हैदराबादसाठी स्फोटक शतक झळकावले. चौथ्या क्रमांकावर फलंदाजी करताना त्याने ५१ चेंडूत १०४ धावा केल्या. क्लासेनच्या खेळीत ८ चौकार आणि ६ षटकारांचा समावेश होता. यादरम्यान त्याचा स्ट्राइक रेट २०३.९२ होता. आयपीएलमध्ये शतक झळकावणारा क्लासेन हैदराबादचा चौथा खेळाडू ठरला. तत्पूर्वी, अभिषेक त्रिपाठी ११धावा करून पॅव्हेलियनमध्ये परतला. ब्रेसवेलने त्याला चालायला लावले. सलामीवीर राहुल त्रिपाठी १२ चेंडूत १५धावा करून बाद झाला. ब्रेसवेलने त्रिपाठीलाही पॅव्हेलियनचा रस्ता दाखवला. कर्णधार आदिन मार्कराम २० चेंडूत १८ धावा करून बाद झाला. अखेरीस, हॅरी ब्रूक २७धावा करून नाबाद राहिला. त्याने १९ चेंडूंत २ चौकार आणि १ षटकार ठोकला. ग्लेन फिलिप्स ५ धावा करून बाद झाला. हेही वाचा - Gujarat Titans: हार्दिक पांड्या आणि पत्नी नताशाच्या संघांत रंगला सामना; नाणेफेकीचा मजेशीर VIDEO होतोय व्हायरल सिराज-ब्रेसवेलने गोलंदाजीत कमाल दाखवली - आरसीबीसाठी सिराजने शानदार गोलंदाजी केली. त्याने ४ षटकात केवळ १७ धावा देत एक विकेट घेतली. ब्रेसवेलने २ षटकात १३ धावा देत २ बळी घेतले. शाहबाज अहमदने ३ षटकात ३८ धावा देत १ बळी घेतला. हर्षल पटेलने ४ षटकात ३७ धावा देत १ बळी घेतला. कर्ण शर्मा आणि पारनेल यांना एकही विकेट मिळाली नाही.
