Hardik Pandya Shares Funny Video Of Natasha: इंडियन प्रीमियर लीग २०२३ (आयपीएल २०२३) मध्ये, हार्दिक पांड्याच्या नेतृत्वाखालील गुजरात टायटन्स संघाने चमकदार कामगिरी केली आहे. गेल्या वर्षी हा संघ पहिल्याच सत्रात चॅम्पियन ठरला होता. मागील वर्षी प्रमाणे यंदाही गुजरात टायटन्स प्लेऑफमध्ये पोहोचणार पहिला संघ ठरला आहे. त्यामुळे सध्या हार्दिक पांड्या आणि त्याचा संघ निवांत आहे. या दरम्यान, हार्दिक पांड्याने इन्स्टाग्रामवर एक मजेदार व्हिडिओ शेअर केला आहे. यामध्ये हार्दिक पांड्या आणि त्याची पत्नी नताशा स्टॅनकोविक यांच्या संघात सामना होणार असल्याचे दिसत आहे.
या व्हिडीओमध्ये प्रेझेंटर्स जतीन सप्रू, कृणाल पंड्या आणि इशान किशन देखील दिसत आहेत. टॉस दरम्यान नताशाकडून एक मोठी चूक होते. यानंतर हार्दिक पांड्या तिची खूप चेष्टा करतो. सगळे हसायला लागतात. नाणेफेकीसाठी हार्दिक पांड्या नाणे वर फेकतो, त्यावेळी नताशा हेड की टेल बोलायला विसरते. यानंतर हार्दिक पांड्या तिची मस्करी करतो. त्याचबरोबर तिची नक्कल करतानाही दिसतो.
नाणेफेक जिंकून नताशा प्रथम फलंदाजीचा निर्णय घेते –
त्यानंतर पुन्हा एकदा नाणेफेक होते. जेव्हा हार्दिक पांड्या नाणे फेकतो तेव्हा नताशा हेड बोलते आणि नाणेफेक जिंकते. यानंतर जतीन तिला विचारतो की तिला काय करायला आवडेल? ती प्रथम फलंदाजी करण्याचा निर्णय घेते. तिला कारण विचारल्यावर ती म्हणते की, खेळपट्टी खूप चांगली आहे. यानंतर सगळे पुन्हा हसायला लागतात. हा मजेशीर व्हिडिओ सोशल मीडियावर व्हायरल होत आहे.
गुजरातचा संघ प्लेऑफमध्ये पोहोचला –
आयपीएल २०२३ मध्ये, जिथे चेन्नई सुपर किंग्स (सीएसके), मुंबई इंडियन्स (एमआय) आणि रॉयल चॅलेंजर्स बंगळुरु (आरसीबी) सारखे संघ प्लेऑफमध्ये पोहोचण्यासाठी संघर्ष करत आहेत, तिथे गुजरात संघ आरामात प्लेऑफमध्ये पोहोचला आहे. संघाचे १३ सामन्यांत १८ गुण आहेत. त्यामुळे अशा स्थितीत क्वालिफायर- १ खेळण्यासाठी गुजरातचा संघ सज्ज झाला आहे. दुसरा कोणताही संघ इतक्या गुणांपर्यंत पोहोचू शकत नाही.
