Royal Challengers Bangalore vs Gujrat Titans Match Update : आयपीएल २०२३ चा ७० वा सामना रॉयल चॅलेंजर्स बंगळुरु आणि गुजरात टायटन्स यांच्यात चिन्नास्वामी स्टेडियममध्ये होत आहे. गुजरातने नाणेफेक जिंकून प्रथम गोलंदाजी करण्याचा निर्णय घेतला. त्यानंतर मैदानात उतरलेल्या आरसीबीच्या फलंदाजांनी गुजरात टायटन्सच्या गोलंदाजांचा धुव्वा उडवला. विराट कोहली आणि कर्णधार फाफ डु प्लेसिस या सलामी जोडीनं पॉवर प्ले मध्ये चौफेर फटकेबाजी केली. फाफ बाद झाल्यानंतर कोहलीनं पुन्हा एकदा ‘विराट’ खेळी करत यंदाच्या आयपीएलमध्ये सलग दुसरं शतक ठोकलं.
आयपीएलच्या इतिहासात सात शतक ठोकण्याचा विक्रम विराट कोहलीच्या नावावर झाला आहे. विराट कोहलीने ६१ चेंडूत १३ चौकार आणि १ षटकार ठोकून धावांचा पाऊस पाडत १०१ धावांची नाबाद खेळी केली. त्यामुळं आरसीबीने २० षटकात ५ विकेट्स गमावत १९७ धावांपर्यंत मजल मारली. गुजरात टायटन्सला विजयासाठी १९८ धावांचं लक्ष्य गाठावं लागणार आहे.
आरसीबीसाठी कर्णधार फाफ डु प्लेसिसने १९ चेंडूत २८ धावा केल्या. नूर अहमदच्या फिरकीवर फाफ बाद झाला आणि आरसीबीला मोठा धक्का बसला. विराटने पुन्हा एकदा धडाकेबाज फलंदाजी केली अन् गुजरातविरोधातही शतकी खेळी करत इतिहास रचला. विराट ६१ चेंडूत १०१ धावा करून नाबाद राहिला. ग्लेन मॅक्सवेल ११ धावांवर असताना राशिद खानच्या गोलंदाजीवर क्लीन बोल्ड झाला. माहिपाल लोमरोरलाही धावांचा सूर गवसला नाही. तो फक्त १ धाव करून नूर अहमदच्या गोलंदाजीवर बाद झाला. पण ब्रेसवेलने गुजरातच्या गोलंदाजांचा समाचार घेत २६ धावा केल्या. तो शमीच्या गोलंदाजीवर बाद झाला. तर अनुज रावत १५ चेंडूत २३ धावा करत नाबाद राहिला.
