Virat Kohli’s Controversy With Lucknow Players:आयपीएल २०२३ मध्ये रॉयल चॅलेंजर्स बंगलोर आणि लखनऊ सुपरजायंट्स यांच्यातील सामन्यात विराट कोहली खूपच आक्रमक दिसत होता. सामन्यादरम्यान अनेक खेळाडूंसोबत त्याचा वाद झाला. नवीन उल हक याच्यापासून वादाची सुरूवात झाली. यानंतर तो अमित मिश्रा आणि गौतम गंभीर यांच्याशीही भिडला. अखेर लोकेश राहुल आणि इतर खेळाडूंनी मध्यस्थी केल्यानंतर हा वाद मिटली. त्यानंतर विराट कोहलीने इन्स्टाग्रामवर एक स्टोरी शेअर केली आहे, जी सध्या मोठ्या प्रमाणात व्हायरल होत आहे.
या सामन्यानंतर विराट कोहलीने इन्स्टाग्रामवर एक स्टोरी पोस्ट केली आहे, जी त्याचे स्पष्टीकरण म्हणून पाहिले जात आहे. या स्टोरी लिहिले आहे की “आपण जे ऐकतो ते तथ्य नसून मत असते. आपण जे पाहतो ते तथ्य नसून एक दृष्टीकोण असतो.” यासोबतच विराटने खाली मार्कस ऑरेलियसचे नावही लिहिले आहे, ज्यावरून हे वाक्य माजी रोमन सम्राट मार्कस ऑरेलियसचे असल्याचे दिसून येते. याशिवाय विराट कोहलीने आपला डीपीही बदलला आहे. नवीन डीपीमध्ये तो पत्नी अनुष्कासोबत दिसत आहे.
काय घडलं मॅचमध्ये?
लखनऊच्या डावाच्या १७ व्या षटकात विराट स्टंपच्या मागून धावत आला आणि नवीनला काहीतरी इशारा करत म्हणाला. येथून संपूर्ण प्रकरणाला सुरुवात झाली. त्यावर अफगाणिस्तानचा नवीनही त्याच्या जवळ आला आणि दोघांमध्ये वाद सुरू झाला. या वादादरम्यान विराटनेही आपल्या बुटाकडे बोट दाखवत इशारा केला, तसेच त्यातून माती काढली. जणू तो स्टेटसबद्दल बोलत होता. बाकीच्या खेळाडूंनी मध्यस्थी करण्याचा प्रयत्न केला, तेव्हा कोहली आणि अमित मिश्रा यांच्यातही वाद झाला.
बंगळुरूच्या विजयानंतर दोन्ही संघांचे खेळाडू हस्तांदोलन करत असताना कोहली नवीनला काहीतरी म्हणाला. येथेही दोघांमध्ये वादावादी झाली. यानंतर कोहली सीमेवर चालत असताना तो लखनऊच्या काइल मेयर्सशी बोलू लागला. त्यानंतर गंभीर येतो आणि मेयर्सला विराटपासून दूर घेऊन जातो आणि त्याच्याशी बोलण्यास नकार देतो. यानंतर गंभीर काहीतरी बोलतो, ज्यावर कोहली त्याला जवळ बोलावतो आणि दोघामध्ये चर्चा सुरु असताना वादावादी होते.
