MS Dhoni And Deepak Chahar, IPL Final 2023: महेंद्रसिंग धोनीच्या नेतृत्वाखाली चेन्नई सुपर किंग्जने पाचव्यांदा आयपीएल विजेतेपद पटकावले. गुजरात टायटन्स विरुद्धच्या १६व्या हंगामातील अंतिम सामन्यात, रवींद्र जडेजाने चौकार सीएसकेला रोमहर्षक विजय मिळवून दिला. डकवर्थ-लुईस नियमांनुसार चेन्नईने ५ गडी राखून हा विजय मिळवला त्यात जडेजाने महत्त्वाची भूमिका बजावली. या सामन्यानंतर चेन्नईचे खेळाडू एकीकडे खूप आनंदी दिसत होते. त्याचवेळी महेंद्रसिंग धोनी आणि दीपक चाहर यांचा एक व्हिडिओही व्हायरल होत आहे.
या व्हायरल व्हिडिओमध्ये महेंद्रसिंग धोनी दीपक चाहरला त्याच्या जर्सीवर ऑटोग्राफ देण्यास स्पष्ट नकार देताना दिसला. यादरम्यान धोनीने काहीशी नाराजीही व्यक्त केली, मात्र तो पूर्णपणे विनोदाच्या मूडमध्ये होता, त्याचा हा मजेशीर अंदाज चाहत्यांना फार आवडत आहे. यादरम्यान माहीने मॅचमध्ये कॅच सोडल्याबद्दल दीपकला काही टोमणे देखील मारले.
सोशल मीडियावर व्हायरल होत असलेल्या एका व्हिडिओमध्ये, चाहर ऑटोग्राफसाठी धोनीकडे जाताना दिसत आहे परंतु थालाने त्याची फिरकी घेतली आणि त्याच्या शर्टवर ऑटोग्राफ करण्यास नकार दिला. व्हिडिओमध्ये धोनी चाहरला झेल सोडले यावरून चेष्टा-मस्करीत बोलताना काही संकेत देताना दिसत आहे. एवढे असूनही चाहर धोनीला त्याचा ऑटोग्राफ मागत राहिला. यानंतर राजीव शुक्लाही यात सामील झाले आणि त्यांनी धोनीला समजावून सांगितले. राजीव शुक्ला यांनी सांगितल्यानंतर धोनीने चाहरच्या जर्सीवर ऑटोग्राफ दिला, अखेर काही क्षणांनंतर चाहरच्या हट्टापुढे माहीने हसून त्याला मिठी मारली. या सामन्यात चाहरने शुबमन गिलचा सोपा झेल सोडला. झेल सोडल्यानंतर गिलने ३६ धावा करत गुजरातला चांगली सुरुवात करून दिली.
आयपीएल २०२३च्या फायनलमध्ये चेन्नई सुपर किंग्सने गुजरात टायटन्सचा पाच विकेट्सनी पराभव केला. मंगळवारी चेन्नई संघाने अहमदाबादच्या नरेंद्र मोदी स्टेडियमवर आयपीएलचे पाचवे विजेतेपद पटकावले. यासह चेन्नईने सर्वाधिक आयपीएल ट्रॉफी जिंकण्याच्या बाबतीत मुंबई इंडियन्सची बरोबरी केली. सामना शेवटच्या चेंडूपर्यंत गेला आणि रवींद्र जडेजाला आपल्या संघाला विजय मिळवून देण्यासाठी खास खेळी खेळावी लागली.
बी साई सुदर्शनने ४७ चेंडूत ९६ धावा करत गुजरात टायटन्सला फलंदाजीचा निर्णय घेतल्यानंतर ४ बाद २१४ धावा करता आल्या. पावसामुळे खेळात व्यत्यय आल्याने चेन्नईला १५ षटकांत १७१ धावांचे लक्ष्य मिळाले. रवींद्र जडेजाने शेवटच्या दोन चेंडूंवर मोहित शर्माच्या चेंडूवर एक षटकार आणि एक चौकार मारून सीएसकेला विजय मिळवून दिला.
अंतिम सामन्यात दीपक चाहर गोलंदाजीत कमी पडला
अंतिम सामन्यात चेन्नई सुपर किंग्जच्या गोलंदाजांची कामगिरी काही खास नव्हती. विजेतेपदाच्या सामन्यात ४ षटकांच्या गोलंदाजीदरम्यान दीपक चाहरला ३८ धावांत केवळ १ विकेट घेता आली. दीपकच्या या मोसमातील कामगिरीबद्दल बोलायचे झाले तर त्याने १० सामन्यांत २२.८४च्या सरासरीने एकूण १३ विकेट्स घेतल्या. या हंगामात चेन्नईसाठी तुषार देशपांडेने सर्वाधिक २१ बळी घेतले आणि त्यानंतर रवींद्र जडेजाने २० बळी घेतले.
