वेस्ट इंडिज दौऱ्यानंतर इशान किशन भारतात परतला आहे. भारतात येताच इशान किशनने सेलिब्रिटी हेअर स्टायलिस्ट अलीम हकीमच्या स्टुडिओमध्ये हेअरकट केला आहे. इशान किशनच्या नवीन हेअरकटची सोशल मीडियावर खिल्ली उडवली जात आहे. इशान किशनने एमएस धोनीची कॉपी केल्याचं काही क्रिकेट चाहत्यांचं म्हणणं आहे.
इशान किशनचा नवीन हेअरकट पाहिल्यानंतर काही चाहत्यांना एमएस धोनीची उणीव भासत आहे. कारण इशानने माहीच्या हेअरकटची कॉपी केली आहे. धोनीने आयपीएल २०२१ च्या अशाच प्रकारची हेअरस्टाईल केली होती. यावरून नेटकरी धोनीला ‘आदिदास’ (ओरिजनल ब्रँड) आणि इशानला ‘अबीबास’ (बनावट ब्रँड) म्हणत खिल्ली उडवताना दिसत आहे. तर “थालाने इशानला चुकीचा सल्ला दिला”, असंही एकाने म्हटलं आहे.
इशान किशनने वेस्ट इंडिज दौऱ्यावर सलग चार अर्धशतके झळकावली होती. मात्र टी-२० मालिकेत त्याला साजेशी कामगिरी करता आली नाही. दुसरीकडे, शुक्रवारपासून आयर्लंडविरुद्ध सुरू होणाऱ्या टी-२० मालिकेसाठी इशानची संघात निवड करण्यात आली नाही. आता सर्वांना आशिया चषक २०२३ मध्ये इशान किशनकडून चांगल्या कामगिरीची अपेक्षा आहे.
भारताचा माजी क्रिकेटपटू आकाश चोप्राने आयर्लंडविरुद्धच्या मालिकेत इशान किशन आणि शुबमन गिलच्या अनुपस्थितीबद्दल निराशा व्यक्त केली आहे. केवळ आयपीएलमध्ये चांगली कामगिरी केल्याने टीम इंडियाला टी-२० विश्वचषक जिंकण्यात मदत होणार नाही, असं आकाश चोप्राने म्हटलं.
