Ishan Kishan Breaks MS Dhoni Record: भारत आणि वेस्ट इंडिज यांच्यात सध्या दुसरा कसोटी सुरू आहे. मात्र, टीम इंडिया या सामन्यात खूप पुढे दिसत आहे. या सामन्यात भारतीय संघाने २ बाद १८१ धावा करून आपला दुसरा डाव घोषित केला. यादरम्यान युवा यष्टीरक्षक फलंदाज इशान किशनने ३४ चेंडूत ४ चौकार आणि २ षटकारांसह १५२.९४ च्या स्ट्राइक रेटने अफलातून अर्धशतक (५२*) ठोकले. या अर्धशतकानंतर इशान किशनने ऋषभ पंतचे आभार मानले. तसेच, त्याने माजी वर्ल्डकप विजेते कर्णधार यष्टीरक्षक महेंद्रसिंग धोनी आणि कपिल देव यांचे विक्रम मोडले आहेत.
इशान किशनने ऋषभ पंतचे मानले आभार
इशान किशनने सामन्याचा चौथा दिवस संपल्यानंतर एका मुलाखतीत सांगितले की, “येथे येण्यापूर्वी मी राष्ट्रीय क्रिकेट अकादमीमध्ये होतो आणि ऋषभ पंतही त्याच्या संघात पुनरागमन करण्यासाठी तिथे मेहनत घेत होता.” यादरम्यान ऋषभने इशानला काही गोष्टी सांगितल्या. इशान म्हणाला, “मी याआधी एनसीएमध्ये होतो. पंतही तिथे होते. मी कसा खेळतो? माझी मानसिकता काय आहे? हे सर्व त्याला माहीत आहे. अंडर-१९ पासून आम्ही एकमेकांना ओळखतो. मला कोणीतरी सल्ला द्यावा अशी माझी नेहमीच इच्छा असते आणि सुदैवाने माझ्या फलंदाजीबाबत काहीतरी सांगण्यासाठी तो तिथे होता.”
इशान पुढे म्हणाला, “असे अनेक वरिष्ठ खेळाडू आहेत जे गोलंदाजांशी सतत बोलत राहतात. उद्या आपला चांगला खेळ व्हायला हवा. आपल्याला चांगली फलंदाजी करून सामना जिंकायचा आहे, त्यासाठी लवकर विकेट घेणे महत्त्वाचे आहे. टी२० आणि एकदिवसीय प्रकारात मी करिअर करावे हे माझे स्वप्न होते पण त्याहीपेक्षा अधिक मिळाले. यासाठी मी खूप खुश आहे. मला फक्त जाऊन प्रत्येक चेंडू मारायचा होता, असे सांगण्यात आले होते. मुख्यतः मी माझ्या आई-वडिलांचे आभार मानेन कारण की, त्यांनी मला नेहमीच पाठिंबा दिला.”
इशान किशनने एम.एस. धोनीचा विक्रम मोडला
दुसऱ्या कसोटीच्या दुसऱ्या डावात भारतीय क्रिकेट संघाचा स्टार फलंदाज इशान किशनने अर्धशतक झळकावले. माहितीसाठी की, किशन त्याच्या कसोटी कारकिर्दीतील दुसरा सामना खेळत आहे. आशिया महाद्वीपच्याबाहेर चौथ्या क्रमांकावर फलंदाजीला आलेला इशान किशन हा फारूख इंजिनियर ( वि. इंग्लंड, लॉर्ड, १९७१) यांच्यानंतरचा दुसराच भारतीय यष्टिरक्षक-फलंदाज ठरला. इशानने आज धोनीचा विक्रम मोडला अन् कपिल देव, वीरेंद्र सेहवाग यांच्या विक्रमांची बरोबरी केली.
कसोटी क्रिकेटमधील इशान किशन या भारतीय यष्टिरक्षकाने ठोकलेले हे दुसरे सर्वात जलद अर्धशतक ठरले. ऋषभ पंतने २८ चेंडूंत श्रीलंकेविरुद्ध २०२२ साली अर्धशतक झळकावले होते. परंतु, किशनने आज एम.एस. धोनीचा पाकिस्तान विरुद्ध ३४ चेंडूत अर्धशतक करण्यचा विक्रम मोडला. भारताकडून ३३ चेंडूंत अर्धशतक झळकावणारा तो चौथा फलंदाज ठरला. कपिल देव यांनी दोन वेळा पाकिस्तान आणि इंग्लंड विरुद्ध १९७८ व १९८२ आली हा विक्रम केला होता. अष्टपैलू हरभजन सिंगने इंग्लंड विरुद्ध २००२ साली आणि माजी सलामीवीर वीरेंद्र सेहवागने वेस्ट इंडिज विरुद्ध २००६ साली हा पराक्रम केला होता.
