IND vs AUS: बुमराह-आकाशदीपची ऐतिहासिक भागीदारी, ७७ वर्षांत ऑस्ट्रेलियाविरूद्ध अशी कामगिरी करणारी पहिलीच जोडी

भारतीय संघ ९ बाद २१३ धावांवर असताना जसप्रीत बुमराह आणि आकाशदीप फलंदाजी करत होते. यानंतर या दोघांनी एखाद्या टॉप ऑर्डरच्या फलंदाजाप्रमाणे बचावात्मक फलंदाजी करत भारताचा डाव पुढे नेला. संधी मिळताच या दोघांनी फटकेबाजीही केली. पाचव्या दिवशी आकाशदीप ट्रॅव्हिस हेडच्या गोलंदाजीवर स्टंपिग होऊन बाद झाल्याने ही महत्त्वपूर्ण ४७ धावांची भागीदारी तुटली. पण या दोघांनी फक्त भारताचा फॉलोऑनच टाळला नाहीतर एक मोठा विक्रमही आपल्या नावे केला आहे.

हेही वाचा – IND vs AUS: आकाशदीपचा गगनचुंबी षटकाराने खुद्द विराटला केलं चकित, भन्नाट प्रतिक्रिया देत कोहलीने ड्रेसिंग रूममध्ये मारली उडी; VIDEO व्हायरल

बुमराह-आकाशदीपने घडवला इतिहास

भारताच्या या दोन्ही फलंदाजांनी आपल्या डावात दणदणीत षटकार लगावले. बुमराहने १० धावांच्या खेळीत शानदार षटकार ठोकला. आकाश दीपनेही ३१ धावा करताना २ चौकार आणि १ षटकार लगावला. यासह ऑस्ट्रेलियाविरुद्धच्या ७७ वर्षांच्या कसोटी इतिहासात प्रथमच टीम इंडियाच्या १०व्या आणि ११व्या क्रमांकाच्या फलंदाजाने षटकार लगावण्याचा पराक्रम केला आहे. याआधी १०व्या आणि ११व्या क्रमांकाच्या फलंदाजाने कांगारू संघाविरुद्ध कधीही अशी कामगिरी केली नव्हती. भारत आणि ऑस्ट्रेलिया यांच्यात १९४७ मध्ये पहिला कसोटी सामना खेळला गेला होता.

हेही वाचा – IND vs AUS: आकाशदीपचा चौकार अन् गंभीर-विराटचं आक्रमक सेलिब्रेशन, भारताने फॉलोऑन टाळताच ड्रेसिंग रूममधील VIDEO व्हायरल

भारताविरुद्धच्या गाबा कसोटी सामन्यात ऑस्ट्रेलियन संघाने दमदार कामगिरी केली आहे. या सामन्यात ऑस्ट्रेलियाने प्रथम फलंदाजी करत ४४५ धावा केल्या. याला प्रत्युत्तर देताना टीम इंडियाची अवस्था बिकट झाली. भारताची टॉप ऑर्डर ५० धावा करण्याच्या आतच कोसळली. जडेजा (७७) आणि केएल राहुलच्या (८४) शानदार खेळीच्या जोरावर भारताने चांगलं पुनरागमन केलं पण फॉलोऑनचा धोका मात्र संघावर होता. पण हे दोघेही बाद झाल्यानंतर बुमराह आणि आकाशदीपने आपली कामगिरी चोख बजावली.

हेही वाचा – IND vs AUS: भारताचा फॉलोऑन टळला! बुमराह-आकाशदीपच्या जोडीने जीवाची लावली बाजी, जडेजा-राहुलने रचला होता पाया

गाबा कसोटीच्या पाचव्या दिवशी टीम इंडिया २६० धावांवर सर्वबाद झाली. यासह ऑस्ट्रेलियाकडे आता एकूण १८५ धावांची आघाडी आहे. याचबरोबर ऑस्ट्रेलियाचा डाव सुरू होणारच होता तितक्यात आकाशात ढग दाटून आले आणि एकच अंधार पसरला. काही वेळानंतर पावसाला सुरूवात झाली असून पुढील खेळ सुरू होण्यासाठी वेळ लागत आहे.