Jasprit Bumrah Back Injury: बुमराच्या दुखापतीनंतर ‘बीसीसीआय’ची मोठी घोषणा; पर्यायी गोलंदाजाचं नाव केलं जाहीर

टी-२० विश्वचषकाला तीन आठवड्यांहून कमी कालावधी शिल्लक असून त्यापूर्वीच भारतीय संघाला बुमरा बाहेर पडल्याने मोठा धक्का बसला आहे. सध्या दक्षिण आफ्रिकेविरुद्ध सुरु असणाऱ्या तीन टी-२० सामन्यांच्या मालिकेमध्येही बुमरा संघाचा सदस्य होता. मात्र आता दुखापतीमुळे तो या मालिकेतूनही बाहेर पडला असून त्याच्या जागी मोहम्मद सिराजला संघात स्थान देण्यात आलं आहे. ‘बीसीसीआय’ने यासंदर्भातील घोषणा केल्याची माहिती एएनआय या वृत्तसंस्थेनं दिली आहे.

‘‘बुमरा विश्वचषक स्पर्धेत खेळू शकणार नाही. त्याच्या पाठीची दुखापत गंभीर आहे. या दुखापतीमुळे त्याला जवळपास सहा महिने मैदानाबाहेर राहावे लागू शकेल,’’ असं ‘बीसीसीआय’च्या वरिष्ठ अधिकाऱ्याकडून सांगण्यात आले. परंतु ‘बीसीसीआय’ने याबाबत अधिकृत घोषणा केलेली नाही.