Jasprit Bumrah Practice Team India: यावर्षी ५ ऑक्टोबरपासून सुरू होणाऱ्या ५० षटकांच्या विश्वचषकापूर्वी भारतीय संघासाठी एक आनंदाची बातमी आहे. दुखापतीमुळे बराच काळ बाहेर असलेला जसप्रीत बुमराह लवकरच ‘मेन इन ब्लू’ मध्ये मैदानात दिसणार आहे. पाठीवरील शस्त्रक्रियेनंतर २९ वर्षीय बुमराह सध्या बंगळुरू येथील राष्ट्रीय क्रिकेट अकादमीमध्ये प्रशिक्षण घेत आहे. तो हळूहळू त्याच्या सरावाचा वेग वाढवत असून पुन्हा फिटनेस मिळविण्याच्या अगदी जवळ पोहचला आहे. यासोबतच संघाबाहेर असणारा आणखी एक महत्त्वाचा फलंदाज श्रेयस अय्यरनेही शस्त्रक्रियेनंतर पुन्हा फलंदाजीला सुरुवात केली आहे. सर्व काही ठीक राहिल्यास, पुढील महिन्यात आयर्लंड दौऱ्यावर होणाऱ्या टी२० मालिकेत दोन्ही खेळाडू टीम इंडियाचा भाग असतील!
बुमराह दिसणार आयर्लंड दौऱ्यावर!
जसप्रीत बुमराह बीसीसीआय क्रिकेट प्रमुख व्हीव्हीएस लक्ष्मण यांच्या देखरेखीखाली सराव करत असून लवकरच तो टीम इंडियात पुनरागमन करेल. नेटमध्ये तो गेल्या काही दिवसांपासून ८-१० षटके गोलंदाजी करत आहे, असे इंडियन एक्सप्रेसने वृत्त दिले आहे. आतील माहिती अशी आहे की, निवडकर्ते आणि संघ व्यवस्थापन सप्टेंबरमध्ये आशिया चषकासाठी बुमराहचा समावेश करण्याचा विचार करत आहेत. गेल्या काही आठवड्यात त्याने दाखवलेला फिटनेस पाहता तो कमी अनुभवी भारतीय संघासह पुढील महिन्यात आयर्लंड दौऱ्यावर जाऊ शकतो. येत्या काही दिवसांत यावर निर्णय होईल, असे मानले जात आहे.
नुकताच बुमराहचा एक व्हिडिओ समोर आला आहे. एका ट्वीटर यूजरने बुमराहचा व्हिडीओ ट्वीट केला आहे. यामध्ये तो नेटमध्ये गोलंदाजी करताना दिसत आहे. बुमराहची मार्चमध्ये शस्त्रक्रिया झाली होती. यानंतर तो पुनरागमनासाठी NCA मध्ये प्रशिक्षण घेत आहे. माजी दिग्गज क्रिकेटर व्हीव्हीएस लक्ष्मणची नजर बुमराहवर असून त्यांच्या प्रशिक्षणाखाली तो सराव करत आहे.
विशेष म्हणजे बुमराह हा टीम इंडियाचा अनुभवी गोलंदाज आहे. त्याने आतापर्यंत ७२ वनडे त १२१ विकेट्स घेतल्या आहेत. या फॉरमॅटमध्ये त्याने दोनदा पाच-पाच विकेट्स घेतल्या आहेत. बुमराहने ३० कसोटी सामन्यात १२८ विकेट्स घेतल्या आहेत. त्याने ६० आंतरराष्ट्रीय सामनेही खेळले आहेत, ज्यामध्ये त्याने ७० विकेट्स घेतल्या आहेत. सप्टेंबर २०२२ मध्ये तो टीम इंडियासाठी शेवटचा सामना खेळला होता. ऑस्ट्रेलियाविरुद्धच्या या टी२० सामन्यानंतर तो संघाबाहेर आहे.
श्रेयस अय्यर कधी पुनरागमन करणार?
गेल्या काही वर्षांपासून क्रिकेटच्या तिन्ही फॉरमॅटमध्ये टीम इंडियाच्या प्लेइंग इलेव्हनचा भाग असलेला श्रेयस अय्यर पुन्हा-पुन्हा दुखापतग्रस्त होत आहे. त्याच्या पाठीची दुखापत वेळोवेळी पुन्हा दिसून आली आहे. शस्त्रक्रियेनंतर त्याने पुन्हा फलंदाजीला सुरुवात केली आहे. गेल्या फेब्रुवारी-मार्चमध्ये ऑस्ट्रेलियाविरुद्धच्या कसोटीदरम्यान दुखापतीमुळे मधल्या फळीतील या फलंदाजाला आयपीएलला मुकावे लागले होते. बुमराहप्रमाणेच अय्यरही आयर्लंडला जाण्याची शक्यता आहे.
