Jay Shah has take over the post of ICC President : भारतीय क्रिकेट नियामक मंडळाचे (बीसीसीआय) सचिव जय शाह यांनी आंतरराष्ट्रीय क्रिकेट परिषदेचे (आयसीसी) चेअरमनपद स्वीकारले आहे, ग्रेग बार्कले यांची जागा घेणारे ३५ वर्षीय जय शाह हे आयसीसीच सर्वात तरुण अध्यक्ष बनले आहेत. २०२० मध्ये पहिल्यांदा या पदावर नियुक्त झाल्यानंतर बार्कलेने तिसरी टर्म न घेण्याचा निर्णय घेतला होता. त्यांच्यानंतर या पदासाठी जय शहा यांची निवड झाली.
जय शाहने आयसीसीचे चेअरमनपद स्वीकारणारे पाचवे भारतीय –
जय शाह आता शरद पवार, एन श्रीनिवासन, शशांक मनोहर आणि जगमोहन दालमिया यांसारख्या भारतीय प्रशासकांच्या यादीत सामील झाले आहेत. जय शाहने २००९ मध्ये क्रिकेट प्रशासनातील आपला प्रवास सुरू केला होता. सेंट्रल क्रिकेट बोर्ड, अहमदाबादच्या कार्यकारी मंडळाचे सदस्य म्हणून त्यांनी प्रवास सुरु केला होता, सप्टेंबर २०१३ मध्ये, शाह यांनी गुजरात क्रिकेट असोसिएशन (जीसीए) चे संयुक्त सचिव झाल्यानंतर अहमदाबादमधील प्रतिष्ठित नरेंद्र मोदी स्टेडियमच्या बांधकामात मदत केली. २०१५ मध्ये, ते बीसीसीआयमध्ये वित्त आणि विपणन समितीचे सदस्य म्हणून सामील झाले.
आयसीसीने चेअरमनपदाची जबाबदारी स्वीकारल्यानंतर जय शाह यांचे विधानही प्रसिद्ध केले, ज्यात त्यांनी म्हटले की, ते क्रिकेटच्या जागतिक विस्तारावर अधिक लक्ष केंद्रित करणार आहेत, ज्यामध्ये २०२८ मध्ये होणारे ऑलिम्पिक खेळ हा एक महत्त्वाचा टप्पा ठरेल. ज्यावर आयसीसी सध्या विशेष लक्ष देणार आहे. याबाबत सर्व आयसीसी सदस्यांसोबत संयुक्तपणे काम केले जाईल. हे पद स्वीकारताना मला खूप सन्मान वाटतो. जगभरात या गेमसाठी भरपूर क्षमता आहे, ज्यामध्ये आम्हाला नवीन चाहते जोडण्याची संधी देखील मिळेल. महिला क्रीडा विकासाला गती देण्यासाठी प्रयत्न करणे हे आमचे लक्ष्य असेल. त्याचबरोबर ते चॅम्पियन्स ट्रॉफी २०२५ बाबतही निर्णय घेतील.
जय शाह यांच्यासमोरील आव्हाने कोणती?
जय शाह यांनी आयसीसीची सूत्रे हाती घेतल्याने त्यांच्याकडे मोठ्या जबाबदाऱ्या असतील हे वेगळे सांगण्याची गरज नाही. भारत, ऑस्ट्रेलिया आणि इंग्लंड हे ‘बिग 3’ आहेत आणि आयसीसीला या देशांच्या सामन्यांमधून सर्वाधिक महसूल मिळतो. ‘बिग 3’ लाही आयसीसीचा सर्वाधिक महसूल मिळतो. याआधी क्रिकेट वेस्ट इंडिजचे प्रमुख जॉनी ग्रेव्ह म्हणाले होते की, महसूल वाटपाचे मॉडेल पूर्णपणे तुटले आहे. किमान कसोटी खेळणाऱ्या देशांना पुरेसा पैसा मिळावा, जेणेकरून ते पुढे जाऊ शकतील, हे शहा यांच्यासमोर आव्हान आहे.
