फुटबॉल अकादमीसाठी जॉन अब्राहम आसाम सरकारला मदत करणार

इशान्येकडील राज्यांमधली क्रीडासंस्कृती जपण्यासाठी बॉलिवूड अभिनेता जॉन अब्राहम सरसावला आहे. आसाम सरकारला फुटबॉल अकादमी उभी करण्यासाठी जॉन अब्राहम मदत करणार असल्याचं समजतंय. आसामचे मुख्यमंत्री आणि भारताचे माजी क्रीडामंत्री सर्बानंद सोनोवाल यांनी यासंदर्भात माहिती दिली. इंडियन सुपर लिग (ISL) स्पर्धेत जॉन अब्राहमकडे, नॉर्थइस्ट युनायटेड एफसी या संघाची मालकी आहे. जॉनच्या संघात इशान्येकडील राज्यातील अनेक खेळाडूंना संधी देण्यात येते. आसाममध्ये खेळाडूंना चांगल्या दर्जाच्या सुविधा उपलब्ध करुन देणं ही आमची जबाबदारी आहे, याच दृष्टीकोनातून आम्ही फुटबॉल अकादमी उभारण्यासाठी जॉन अब्राहमची मदत घेत असल्याचं, सोनोवाल यांनी स्पष्ट केलं.