जोहोर चषक हॉकी स्पर्धा : भारतीय कुमार संघ विजेता; अंतिम लढतीत शूटआऊटमध्ये ऑस्ट्रेलियावर मात; गोलरक्षक मोहित, कर्णधार उत्तमची चमक

बचावपटूंची कसोटी लागलेला सामना नियोजित वेळेत १-१ असा बरोबरीत राहिला होता. त्यानंतर झालेल्या शूट-आऊटही ३-३ अशी बरोबरी झाली. त्यानंतर घेण्यात आलेल्या ‘सडन-डेथ’मध्ये भारताने बाजी मारली. भारताचा गोलरक्षक मोहित सुशीलकुमारची कामगिरी निर्णायक ठरली. भारताकडून ‘शूट-आऊट’ मध्ये विष्णूकांत सिंग, श्रद्धानंद तिवारी, बॉबी सिंग यांनी गोल केले. ऑस्ट्रेलियासाठी लियाम हर्ट, जायडेन अ‍ॅटकिन्स, ब्रुक्स जोशुआ यांनी गोल केले. शूटआऊटमधील

३-३ अशा बरोबरीनंतर ‘सडन-डेथ’ घेण्यात आले. यामध्ये भारताकडून उत्तम सिंग आणि सुदीप चिर्माको यांनी गोल केले. ऑस्ट्रेलियाच्या बर्न्‍सलाच गोल करण्यात यश आले. लियाम हर्ट, फोस्टर आणि जोशुआ यांचे गोल करण्याचे प्रयत्न व्यर्थ ठरले. नियोजित सामन्यातील दोन्ही गोल पूर्वार्धात झाले. भारताकडून १३व्या मिनिटाला सुदीपने गोल केला. मात्र, भारताला आघाडी राखता आली नाही. सामन्याच्या २८व्या मिनिटाला जॅक हॉलंडने ऑस्ट्रेलियाला बरोबरी साधून दिली. त्यानंतर दोन्ही संघांना गोल करण्यात अपयश आले. भारताने यापूर्वी २०१३ आणि २०१४मध्ये या स्पर्धेचे विजेतेपद मिळविले होते. याशिवाय २०१२, २०१५, २०१८ आणि २०१९मध्ये भारतीय संघ उपविजेता राहिला होता. त्यानंतर २०२० आणि २०२१मध्ये कोरोनामुळे स्पर्धा झाली नव्हती.