Harbhajan Singh Kamran Akmal Video Viral : वर्ल्ड चॅम्पियनशिप ऑफ लिजेंड्समध्ये भारत-पाकिस्तान सामन्यादरम्यान शनिवारी पाकिस्तानचा दिग्गज क्रिकेटर कामरान अकमलचा सामना भारतीय दिग्गज हरभजन सिंगशी झाला. दोघेही बर्मिंघममध्ये एकमेकांशी बोलताना दिसले, त्यानंतर पुन्हा एकदा अर्शदीप सिंगवरील कमेंटचा मुद्दा समोर आला. वास्तविक, कामरानने टी-२० वर्ल्ड कपमधील भारत-पाकिस्तान सामन्यादरम्यान अर्शदीप सिंगवर वादग्रस्त टिप्पणी केली होती. ज्यावर हरभजनने पाकिस्तानी दिग्गजांना फटकारले होते. आता दोघे एका सामन्यात आमनेसामने आले होते, ज्याचा व्हिडीओ व्हायरल होत आहे.
कामरान भज्जीला समजावत राहिला –
सोशल मीडियावर व्हायरल होत असलेला व्हिडीओ हा वर्ल्ड चॅम्पियनशिप ऑफ लिजेंड्स स्पर्धेतील आहे. दोघेही त्यांच्या आधीच्या वादाबद्दल बोलत असल्याचा अंदाज बांधला जात आहे. व्हिडिओमध्ये पाकिस्तानी खेळाडू भज्जीला काहीतरी समजावण्याचा प्रयत्न करत असताना हरभजन सिंग खूपच आक्रमक दिसत आहे. मात्र, दोघांमध्ये काय संभाषण सुरू आहे, हे कोणालाच माहीत नाही. दोघेही त्यांच्या आधीच्या वादाबद्दल बोलत असल्याचा अंदाज बांधला जात आहे.
काय आहे संपूर्ण प्रकरण?
वास्तविक, टी-२० वर्ल्ड कप २०२४ च्या ग्रुप स्टेजमध्ये भारताने पाकिस्तानचा सहा धावांनी पराभव केल्यावर संपूर्ण वाद निर्माण झाला होता. त्यानंतर पाकिस्तान स्पर्धेतून बाहेर पडला. त्या सामन्यात शानदार गोलंदाजी करणाऱ्या अर्शदीप सिंगची खिल्ली उडवताना कामरान अकमलने संपूर्ण शीख धर्माची खिल्ली उडवली होती. त्यावर हरभजन सिंगने कामरान अकमलला खडे बोल सुनावले होते.
हेही वाचा – ‘या’ माजी खेळाडूला भारतरत्न द्या, टी-२० विश्वचषक जिंकल्यानंतर सुनील गावसकरांची सरकारकडे मागणी
हरभजनने कामरानला खडसावले होते –
हरभजन सिंग म्हणाला होता, “कामरान अकमलने हे समजून घेतले पाहिजे की, कोणाच्याही धर्माबद्दल काहीही बोलण्याची आणि त्याची खिल्ली उडवण्याची गरज नाही. मला कामरान अकमलला विचारायचे आहे की त्याला शिखांचा इतिहास माहित आहे का, शीख कोण आहेत आणि ते कोण आहेत. तुमच्या समाजाला, तुमच्या माता-भगिनींना वाचवण्यासाठी शिखांनी जे काही काम केले आहे. हे तुमच्या पूर्वजांना विचारा, शीख लोक रात्री १२ वाजता मुघलांवर हल्ला करायचे आणि तुमच्या माता-भगिनींना सोडवून आणायचे, त्यामुळे फालतू बोलणे बंद करा.”
हेही वाचा – WCL 2024 : ४४व्या वर्षी ख्रिस गेलचा झंझावात; चौकार-षटकारांनी पुन्हा जिंकली चाहत्यांची मनं, VIDEO व्हायरल
कामरान अकमलने मागितली होती माफी –
माजी भारतीय क्रिकेटपटू हरभजन सिंगने खडलावल्यानंतर कामरान अकमलने जाहीरपणे माफी मागितली होती. कामरान अकमलने नंतर त्याच्या शब्दाबद्दल माफी मागताना म्हणाला, “मला माझ्या अलीकडील टिप्पण्यांबद्दल मनापासून खेद आहे आणि मी भज्जीची मनापासून माफी मागतो. माझे शब्द अयोग्य आणि शीख समुदायाचा अपमान करणारे होते. मला जगभरातील शीख लोकांबद्दल अत्यंत आदर आहे आणि कोणालाही दुखावण्याचा माझा हेतू नव्हता. मला खरच माफ करा.”
© IE Online Media Services (P) Ltd
