भारताची आंतरराष्ट्रीय धावपटू ‘सावरपाडा एक्स्प्रेस’ कविता राऊतची खडतर वाटचाल आता धडय़ाच्या स्वरूपात इयत्ता पाचवीच्या विद्यार्थ्यांना अभ्यासक्रमात असणार आहे. नाशिकच्या यशवंतराव चव्हाण महाराष्ट्र मुक्त विद्यापीठाच्या ‘यशवार्ता’ या मासिकाचे कार्यकारी संपादक संतोष साबळे लिखित कविता राऊतवरील धडय़ाचा समावेश येत्या शैक्षणिक वर्षांपासून ‘बालभारती’च्या नवीन अभ्यासक्रमात करण्यात आला आहे.
महाराष्ट्र राज्य पाठय़पुस्तक निर्मिती व अभ्यासक्रम संशोधन मंडळ अर्थात ‘बालभारती’ने येत्या शैक्षणिक वर्षांपासून या पाठाचा समावेश अभ्यासक्रमात करण्याचा निर्णय घेतला आहे. अतिशय प्रतिकूल परिस्थितीवर मात करत राष्ट्रकुल क्रीडा स्पर्धा आणि आशियाई क्रीडा स्पर्धेत भारताला पदक मिळवून देणाऱ्या कविताच्या संघर्षमय प्रवासावरील हा धडा विद्यार्थ्यांना प्रेरणादायी ठरणार असल्याने त्याचा समावेश पुस्तकात करण्यात आला आहे.
कविता सध्या मुक्त विद्यापीठातूनच शिक्षण घेत आहे. मराठी भाषा समितीचे ज्येष्ठ सदस्य इरगोंडा पाटील यांच्या मार्गदर्शनाखाली तयार करण्यात आलेल्या या पुस्तकात यदुनाथ थत्ते, डॉ. अनिल गोडबोले, डॉ. सरोजिनी बाबर, द. मा. मिरासदार, कवयित्री बहिणाबाई चौधरी या मान्यवरांचे धडे आणि कवितांचाही समावेश आहे.
सावरपाडय़ाचे नाव देशभर झाले असले तरी माझ्या जीवन प्रवासावरील धडय़ाचा बालभारतीने अभ्यासक्रमात समावेश केल्याने खूप आनंद झाला. राज्यातील मुलींनी शिक्षणाबरोबर क्रीडा क्षेत्राकडेवळायला हवे असे वाटते. यासाठी मुक्त विद्यापीठ उत्तम पर्याय आहे.
-कविता राऊत (आंतरराष्ट्रीय धावपटू)
हजारपेक्षा जास्त प्रीमियम लेखांचा आस्वाद घ्या ई-पेपर अर्काइव्हचा पूर्ण अॅक्सेस कार्यक्रमांमध्ये निवडक सदस्यांना सहभागी होण्याची संधी ई-पेपर डाउनलोड करण्याची सुविधा
