Kevin Pietersen : टीम इंडियाचा फलंदाजी प्रशिक्षक होण्यासाठी इंग्लंडचा ‘हा’ दिग्गज उत्सुक, पोस्ट होतेय व्हायरल

वास्तविक, गौतम गंभीरने पदभार स्वीकारल्यापासून भारतीय संघाची कामगिरी काही विशेष झालेली नाही. गंभीरच्या देखरेखीखाली टीम इंडियाने एक टी-२० मालिका, एक वनडे मालिका आणि तीन कसोटी मालिका खेळल्या आहेत, ज्यामध्ये खराब निकाल मिळाले आहेत. अलीकडेच ऑस्ट्रेलियाविरुद्धच्या पाच सामन्यांच्या कसोटी मालिकेत भारतीय संघाला १-२ असा पराभव स्वीकारावा लागला होता. या दौऱ्यात भारतीय फलंदाजांची निराशा झाली. त्यामुळे बीसीसीआय आता कोचिंग स्टाफमध्ये फलंदाजी प्रशिक्षक नेमण्याच्या तयारीत आहे.

भारताचा फलंदाजी प्रशिक्षक होण्यासाठी केव्हिन पीटरसन उत्सुक –

याबाबतचा क्रिकबझचा हा अहवाल समोर येताच सोशल मीडियावर तो वाऱ्यासारखा पसरला. अशा स्थितीत इंग्लंडचा माजी क्रिकेटपटू केव्हिन पीटरसननेही प्रतिक्रिया दिली आणि स्वत:ला भारतीय संघाचा फलंदाजी प्रशिक्षक होण्यास उपलब्ध असल्याचे म्हटले आहे. पीटरसनने हे गमतीने म्हटले आहे की खरंच त्याची टीम इंडियाचा फलंदाजी प्रशिक्षक होण्याचे इच्छा आहे, हे अजून स्पष्ट झालेलेल नाही.

हेही वाचा – Champions Trophy 2025 : ‘भारतात खेळण्याची उणीव भासेल…’, पाकिस्तानच्या खेळाडूचं मोठं वक्तव्य; म्हणाला, ‘पण दुबईत…’

सितांशु कोटकांचे नाव निश्चित होण्याची शक्यता –

टाइम्स ऑफ इंडियाच्या वृत्तात असे म्हटले आहे की बीसीसीआय सितांशु कोटक यांना टीम इंडियाचे फलंदाजी प्रशिक्षक म्हणून नियुक्त करू शकते. कोटक सध्या भारत अ संघाचे मुख्य प्रशिक्षक आहेत. त्यांच्या देखरेखीखाली भारत अ संघाने ऑस्ट्रेलियाचा दौरा केला होता. याशिवाय, राहुल द्रविडच्या अनुपस्थितीत ऑगस्ट २०२३ मध्ये आयर्लंडला गेलेल्या भारतीय संघाचे ते मुख्य प्रशिक्षक होते. या मालिकेत जसप्रीत बुमराहने संघाचे नेतृत्व केले होते.