खो-खो : मुंबई उपनगर, ठाणे, मुंबई उपांत्यपूर्व फेरीत

ठाणे महानगरपालिका आणि ठाणे जिल्हा खो-खो असोसिएशनच्या संयुक्त विद्यमाने आयोजित राज्य अजिंक्यपद व निवड चाचणी खो-खो स्पर्धेत पुरुष गटात मुंबई उपनगर, नाशिक, मुंबई, पुणे व सांगली तर महिला गटात मुंबई, उस्मानाबाद, मुंबई उपनगर, पुणे व ठाणे संघांनी उपांत्यपूर्व फेरीत मजल मारली.
पुरुषांमध्ये उपनगरने रत्नागिरीचा १ डाव व १३ गुणांनी पराभव केला. दिपेश मोरे (४.३० मि. व २ बळी), अक्षय भांगरे (३ मि.) व नचिकेत जाधव (६ बळी) यांनी उपनगरकडून सुरेख खेळ केला. महिलांमध्ये मुंबईने जळगाववर १ डाव व १२ गुणांनी विजय मिळवला. मुंबईकडून दर्शना सकपाळ (४.२० मि.) व साजल पाटील, अनुष्का प्रभू व साक्षी पिळणकर यांनी प्रत्येकी २.४० मि. संरक्षण केले. ठाणे संघाने रायगडवर एक डाव आणि २१ गुणांनी दणदणीत विजय मिळवला. ठाण्याच्या शीतल मोरेने ४ मिनिटे संरक्षण आणि ५ बळी मिळवत अष्टपैलू खेळ केला. पोर्णिमा सकपाळने ५ मि. तर पूजा भोपीने ४ मि. संरक्षण केले. शिल्पा जाधव, आरती कदम, मयुरी पेडणेकर, कविता गोलांबडे व श्रुती सकपाळ यांच्या सुरेख खेळामुळे मुंबई उपनगरने लातूरवर १ डाव व १४ गुणांनी मात केली.