Kieron Pollard and Dwayne Bravo Video: मेजर लीग क्रिकेट (एमएलसी) २०२३ च्या दुसऱ्या क्वालिफायर सामन्यात एमआय न्यूयॉर्कने टेक्सास सुपर किंग्जचा ६ गडी राखून पराभव केला. या विजयासह अंतिम फेरीत आपले स्थान निश्चित केले आहे. या सामन्यात एमआय न्यूयॉर्कने आपली पकड कोणत्याही क्षणी ढासळू दिली नाही आणि सहज विजय मिळवला. त्याचवेळी, सामन्यानंतर मैदानावर एक मजेदार घटना देखील पाहायला मिळाली, जेव्हा किरॉन पोलार्डने त्याच्या भेटीसाठी आलेल्या ड्वेन ब्राव्होची खिल्ली उडवली.
एमआय न्यूयॉर्कने सोशल मीडियावर पोस्ट केलेल्या या व्हिडीओमध्ये दिसत आहे की, जेव्हा ड्वेन ब्राव्हो सामना संपल्यानंतर पोलार्डला भेटायला आला, तेव्हा पोलार्डने हातवारे करून ब्राव्होची खिल्ली उडवली. यादरम्यान पोलार्डच्या बोलण्याला उत्तर देण्यासाठी ब्राव्होनेही त्याच्यासमोर नतमस्तक होऊन त्याला सलाम केला. यानंतर दोघांनी एकमेकांना मिठी मारली. या संपूर्ण क्षणाचा व्हिडीओ सोशल मीडियावर मोठ्या प्रमाणात व्हायरल होत आहे.
ड्वेन ब्राव्हो आणि किरॉन पोलार्ड यांच्यात नेहमीच चांगली मैत्री पाहायला मिळते. जेव्हा चेन्नई सुपर किंग्सने आयपीएल २०१५ च्या मोसमात ट्रॉफी जिंकली होती. त्यानंतर ब्राव्होने पोलार्डसोबतचा एक व्हिडीओ सोशल मीडियावर पोस्ट केला होता. यामध्ये त्याने आपण जास्त टी-२० ट्रॉफी जिंकल्याचे सांगताना पोलार्डचा पाय खेचण्याचा प्रयत्न केला होता. तेव्हा पोलार्डला ब्राव्होने विमानाचा इशारा करत त्याला घरी जाण्यास सांगितले होते. या घटनेचा पोलार्डने बदला घेतला.
एमआय न्यूयॉर्कची अंतिम फेरीत सिएटल ऑर्कासशी लढत होईल –
दुसऱ्या क्वालिफायर सामन्यात, एमआय न्यूयॉर्क संघाला १५९ धावांचे लक्ष्य मिळाले होते, जे त्यांनी १९ षटकांत ४ गडी गमावून पूर्ण केले. संघाच्या लक्ष्याचा पाठलाग करताना डेवाल्ड ब्रेविसने नाबाद ४१ धावा केल्या. याशिवाय सयान जहांगीरने ३६ आणि टीम डेव्हिडने ३३ धावा केल्या. आता अंतिम सामन्यात एमआय न्यूयॉर्क संघाचा सामना सिएटल ऑर्कास संघाशी होणार आहे.
