विश्वचषकासाठी लोकेश राहुलचं फॉर्मात येणं गरजेचं – एम.एस.के. प्रसाद

2019 विश्वचषकासाठी भारतीय संघाची निवड हा सध्या बीसीसीआयच्या निवड समितीसमोर कळीचा मुद्दा ठरतो आहे. पर्यायी सलामीवीर, पर्यायी जलदगती गोलंदाज कोणाला निवडायचं यावरुन अनेक मतमतांतर आहेत. शिखर धवन आणि रोहित शर्मा ही जोडी भारतीय डावाची सुरुवात करेल ही गोष्ट जवळपास निश्चीत असली तरीही पर्यायी सलामीवीराच्या जागेचा प्रश्न अजुन कामय आहे. मध्यंतरीच्या काळात लोकेश राहुल हा पर्यायी सलामीवीर म्हणून समोर आला होता, मात्र गेल्या वर्षभरातल्या त्याच्या कामगिरीमुळे त्याला संघात जागा द्यायची की नाही हा प्रश्न निर्माण झाला आहे. इंग्लंड लायन्स संघाविरुद्ध सराव सामन्यात लोकेशने दमदार कामगिरी करत ऑस्ट्रेलियाविरुद्ध टी-20 आणि वन-डे मालिकेसाठी भारतीय संघात पुनरागमन केलं आहे. आगामी विश्वचषकासाठी भारतीय संघात स्थान मिळवायचं असल्यास राहुलकडे ही अखेरची संधी असल्याचं बोललं जातंय. निवड समितीचे प्रमुख एम.एस.के. प्रसाद यांनीही विश्वचषकासाठी राहुलचं फॉर्मात येणं गरजेचं असल्याचं म्हटलं आहे.