ICC Mens Cricket World Cup Super League : बांगलादेशने आर्यलॅंडला तिसऱ्या एकदिवसीय सामन्यात ४ धावांनी पराभूत केलं. या विजयानंतर बांगलादेशच्या संघानं आर्यलॅंडविरोधात झालेल्या तीन एकदिवसीय सामन्यांची मालिका २-० ने जिंकली. या मालिकेत मिळालेल्या यशानंतर बांगलादेशने वर्ल्डकप सुपर लीगच्या गुणतालिकेत भरारी घेतली आहे. बांगलादेशने मालिका जिंकून गुणतालिकेत भारताला मागे टाकलं आहे.
वर्ल्डकप सुपर लीगच्या गुणतालिकेत बांगलादेशचा संघ तिसऱ्या स्थानावर आहे. तर भारतीय क्रिकेट टीम चौथ्या स्थानावर आहे. यंदाच्या वर्ल्डकपचं यजमानपद भारत भूषवणार आहे. त्यामुळे भारताला क्रिकेट वर्ल्डकपमध्ये थेट प्रवेश मिळाला आहे. भारताशिवाय आणखी ७ संघांना क्रिकेट वर्ल्डकपमध्ये थेट प्रवेश मिळाला आहे. न्यूझीलंड, इंग्लंड, बांगलादेश, पाकिस्तान, ऑस्ट्रेलिया, अफगानिस्तान आणि दक्षिण आफ्रिकेच्या संघाचा यात समावेश आहे.
जे संघ वर्ल्डकपमध्ये क्वालीफाय झाले नाहीत, ते संघ ODI वर्ल्डकप क्वालिफिकेशन राऊंड खेळतील. या राऊंडनंतर टॉपमध्ये असणाऱ्या दोन संघांना वर्ल्डकपमध्ये खेळण्याची संधी मिळेल. वनडे वर्ल्डकपसाठी क्वालिफिकेशन राऊंडची सुरुवात १८ जूनपासून होणार असून १९ जुलै शेवटची तारीख असणार आहे. या राऊंडमध्ये झिम्बाब्वे, श्रीलंका, वेस्टइंडिज आणि आर्यलॅंड संघ सहभागी होणार आहे. याशिवाय नेपाल, ओमान, स्कॉटलॅंडस नेदरलॅंड्स आणि यूएईचा संघही क्वालिफिकेशन राऊंडचा भाग असणार आहे. ही टूर्नामेंट झिम्बाब्वेमध्ये खेळवण्यात येणार आहे.
