India Reserve Day Record: कोलंबोतील आर प्रेमदासा स्टेडियमवर आशिया कप २०२३ च्या सुपर फोर टप्प्यातील भारत आणि पाकिस्तान आमनेसामने आहेत. हा सामना १० सप्टेंबर (रविवार) रोजी होणार होता, परंतु त्या दिवशी पावसामुळे सामना राखीव दिवसासाठी पुढे ढकलावा लागला. भारत सध्या भक्कम स्थितीत असला तरी, पाकिस्तानविरुद्धच्या महत्त्वाच्या सामन्यातील राखीव दिवसातील त्याचा भूतकाळातील विक्रम निश्चितच चिंता वाढवणारे संकेत देत आहे.
भारत यापूर्वी चार वेळा राखीव दिवशी सामना खेळला आहे. वनडेमध्ये तीनदा आणि कसोटीत एकदा. १९९९ च्या विश्वचषकात पहिल्यांदाच भारताचा इंग्लंडविरुद्धचा सामना पावसामुळे राखीव दिवसासाठी हलवण्यात आला होता. भारतीय संघाने हा सामना ६३ धावांनी जिंकला होता. तीन वर्षांनंतर, कोलंबोमध्ये भारत आणि श्रीलंका यांच्यातील चॅम्पियन्स ट्रॉफी २००२ ची फायनल पावसामुळे राखीव दिवसापर्यंत पोहोचली होती. मात्र, राखीव दिवशीही पाऊस सुरूच होता. त्यामुळे सामना रद्द करावा लागला. यानंतर भारत आणि श्रीलंकेच्या संघांना ट्रॉफी विभागून घ्यावा लागली होती.
२०१९ मध्ये टीम इंडिया पहिल्यांदाच झाला होता पराभव –
पुढील वेळी भारत १७ वर्षांनंतर २०१९ च्या एकदिवसीय विश्वचषकाच्या उपांत्य फेरीत न्यूझीलंडविरुद्धचा सामना राखीव दिवसात गेला होता. भारतीय क्रिकेट संघाने राखीव दिवशी सामना गमावण्याची ही पहिलीच वेळ होती. हा सामना भारतीय क्रिकेटमधील सर्वात वाईट घटनांपैकी एक मानला जातो. तो सामना एमएस धोनीचा अंतिम आंतरराष्ट्रीय सामना ठरला.
हेही वाचा – Asia Cup: कोलंबो येथील भारत-पाक सामन्यातील पावसाने करून दिली २००२ ची आठवण, जाणून घ्या काय झाले होते?
त्यानंतर दोन वर्षांनंतर, विश्वचषक २०१९ च्या उपांत्य फेरीची पुनरावृत्ती झाली. यजमान इंग्लंड होते आणि प्रतिस्पर्धी एकच होते आणि निकालही तोच होता. २०२१ च्या वर्ल्ड टेस्ट चॅम्पियनशिप फायनलचा न्यूझीलंडविरुद्धचा पहिला आणि चौथा दिवस पावसामुळे वाहून गेला होता, त्यामुळे सामना सहाव्या दिवशीही म्हणज राखीव दिवशीही सुरू होता. भारताने हा सामना ८ विकेट्सने गमावला होता.
हेही वाचा – IND vs PAK: “माझे फक्त एकच ध्येय आहे की भारताला…”; पाकिस्तानविरुद्धच्या अर्धशतकानंतर शुबमन गिलने केला खुलासा
टीम इंडियाने ४ पैकी फक्त एकच सामना जिंकला –
वरील सर्वा माहितीच्या आधारे भारतीय संघाचा राखीव दिवसातील सामन्यांचा विक्रम चांगला नाही, असे म्हणता येईल. मात्र, पाऊस थांबला आणि सामना खेळला गेला, तर रोहित शर्माच्या नेतृत्वाखालील संघ विजयासह परिस्थिती बदलण्याचा प्रयत्न करताना दिसेल. कारण भारतीय संघ सध्या मजबूत स्थितीत आहे. टीम इंडियाने प्रथम फलंदाजी करताना २४.१ षटकांत २ बाद १४७ धावा अशी धावसंख्या आहे.
