मागील काही दिवसांपासून राज्यात मुंबई क्रिकेट असोसिएशनच्या ( एमसीए ) निवडणुकीची चर्चा रंगली होती. या निवडणुकीत शरद पवार-आशिष शेलार गटाचे अमोल काळे आणि मुंबई क्रिकेट गटाचे संदीप पाटील यांच्यात ‘सामना’ रंगला होता. अखेरी गुरुवारी ( २० ऑक्टोंबर ) मतमोजणीनंतर अमोल काळे यांचा विजय झाला आहे.
अमोल काळे यांना 183 तर संदीप पाटील यांना १५८ मतं पडली आहेत. २५ मतांनी काळेंनी संदीप पाटलांचा पराभव केला आहे. त्यानंतर संदीप पाटील यांनी प्रतिक्रिया व्यक्त केली आहे. अमोल काळेचं कौतुक करतो. तसेच, आगामी काळात मुंबई क्रिकेटसाठी चांगले काम करण्यासाठी शुभेच्छाही पाटील यांनी दिल्या आहेत.
हेही वाचा : शरद पवारांनी आशिष शेलारांबरोबर युती का केली?, संदीप पाटील म्हणाले…
“एमसीएच्या निवडणुकीनंतरही हे सर्व राजकारणी एकत्र राहतील ही अपेक्षा आहे. मुंबई क्रिकेट महत्वाचे असून, संदीप पाटील महत्वाचा नाही. भविष्यात मुंबई किक्रेटसाठी काही जबाबदारी मिळाली, तर निश्चित काम करेल. कारण, त्यासाठी मी घडलो आहे. आयुष्यभर मुंबई क्रिकेटसाठी काही ना काही करावे वाटेल,” असेही संदीप पाटील यांनी नमूद केलं. ते ‘एबीपी माझा’शी बोलत होते.
